კომენტარი

პრეზიდენტის ვეტოს ნაწილში არის მთელი რიგი საკითხები, რასაც ჩვენ ვეთანხმებით - ირმა ინაშვილი

საქართველოს პარლამენტის ვიცე-სპიკერი, ფრაქცია ,,საქართველოს პატრიოტების’’ წევრი, ირმა ინაშვილი სასამართლო რეფორმასთან დაკავშირებულ საკანონმდებლო პაკეტზე პრეზიდენტის მოტივირებულ შენიშვნებს იზიარებს.

,,ვეტოს ნაწილში არის მთელი რიგი საკითხები, რასაც ჩვენ ვეთანხმებით და ვიზიარებთ პრეზიდენტის სულისკვეთებას’’, - განუცხადა ირმა ინაშვილმა ჟურნალისტებს თემის კომენტირებისას.

ცნობისათვის: სასამართლო რეფორმასთან დაკავშირებულ საკანონმდებლო პაკეტს, რომელიც პრეზიდენტს ხელმოსაწერად 10 იანვარს გადაეგზავნა, საქართველოს პრეზიდენტმა ვეტო დაადო და შესაბამისი მოტივირებული შენიშვნებით პარლამენტს გუშინ დაუბრუნა.

შემოთავაზებული წინადადებებით პრეზიდენტი პარლამენტს სთავაზობს, რომ სასამართლოს თავმჯდომარეების არჩევა მოხდეს მოსამართლეების მიერ და არა იუსტიციის საბჭოს მიერ. ასევე, გიორგი მარგველაშვილის მოსაზრებით, ერთსა და იმავე პირს აღარ ექნება საშუალება იყოს სასამართლოს თავმჯდომარე და ამავე დროს პალატისა და კოლეგიის თავმჯდომარე.

პრეზიდენტის წინადადებითვე, სამწლიანი გამოსაცდელი ვადის გამოყენება აღარ მოხდება შემდგომ დანიშვნებზე.

ნინო ექვთიმიშვილი