პოლიტიკა
პრეზიდენტმა დასვა ტოლობის ნიშანი სანდრო გირგვლიანის მკვლელობასა და ხორავას ქუჩაზე მომხდარ ტრაგედიას შორის, რაც პრინციპულად მიუღებელია - პრემიერი
საქართველოს პრემიერ-მინისტრის, მამუკა ბახტაძის განცხადებით, მისთვის პრინციპულად მიუღებელია, რომ პრეზიდენტმა გუშინდელ ბრიფინგზე გაათანაბრა სანდრო გირგვლიანის მკვლელობა და ხორავას ქუჩის საქმე.
„საქართველოში მთავრობის სხდომას ვატარებთ ჩვეულებრივი განრიგითა და ჩვეულებრივი რეჟიმით. ბუნებრივია, მზად ვართ ნებისმიერ საკითხზე სასაუბროდ. რაც შეეხება მთავრობაზე განსახილველ საკითხებს, ამას არეგულირებს შესაბამისი საკანონმდებლო ჩარჩო და ამის შესახებ განცხადებას მთავრობის ადმინისტრაცია აუცილებლად გააკეთებს.
თუ სწორად გავიგე, პრეზიდენტმა დასვა ტოლობის ნიშანი სანდრო გირგვლიანის მკვლელობასა და ხორავას ქუჩაზე მომხდარ ტრაგედიას შორის, ეს არის პრინციპულად მიუღებელი“, - განაცხადა პრემიერმა.
საქართველოს პრეზიდენტმა გიორგი მარგველაშვილმა პრემიერ-მინისტრ მამუკა ბახტაძეს მთავრობის სხდომის მოწვევის ინიციატივით მიმართა. პრეზიდენტის თქმით, ის სხდომაზე დასწრებას აპირებს, სადაც დააყენებს სახელმწიფო ინსიტუტების ეფექტური ფუნქციონირების, ასევე მოქალაქეთა უფლებებისა და თავისუფლებების დაცვის საკითხებს.