პოლიტიკა

,,ქართულ ოცნებაში“ არის რამდენიმე საპრეზიდენტო კანდიდატი, რომლებსაც უმარტივესად შეუძლიათ პირველ ტურში მოგება - ირაკლი კობახიძე

პარლამენტის თავმჯდომარის, ირაკლი კობახიძის განცხადებით, "ქართული ოცნება" საპრეზიდენტო არჩევნებთან დაკავშირებით კონსულტაციებს, სავარაუდოდ, ივლისის ბოლო კვირაში გამართავს.

"კონსულტაციები გვექნება როგორც პოლიტსაბჭოს ფორმატში, ასევე უმრავლესობის ფორმატში. სავარაუდოდ, ეს იქნება ივლისის ბოლო კვირა. იქ უკვე, ალბათ, გაცხადდება ჩვენი პოზიცია საპრეზიდენტო არჩევნებთან დაკავშირებით",- განუცხადა ჟურნალისტებს პარლამენტის თავმჯდომარემ.

რაც შეეხება კონკრეტულ კანდიდატებს, როგორც კობახიძემ აღნიშნა, მმართველ პოლიტიკურ გუნდში "არის რამდენიმე კანდიდატი, რომელსაც უმარტივესად შეუძლია პირველ ტურში მოგება".

სალომე ზურაბიშვილის კანდიდატურასთან დაკავშირებით დასმული კითხვის საპასუხოდ პარლამენტის თავმჯდომარემ აღნიშნა, რომ გუნდში დეტალური მსჯელობაა აღნიშნულ საკითხებთან დაკავშირებით და უნდა დაველოდოთ კონსულტაციებს.

"ჩვენ უნდა ჩამოვაყალიბოთ პოზიცია ჯერ იმასთან დაკავშირებით, როგორ წარვსდგებით საპრეზიდენტო არჩევნებში და ამის შემდეგ შეიძლება საუბარი კონკრეტულ კანდიდატებზე",- განაცხადა ირაკლი კობახიძემ.