კონფლიქტის ზონა

ქართულ საზოგადოებას ესმის, რომ სამხრეთ ოსეთსა და აფხაზეთს ვერ დაინახავს ისევე, როგორც საკუთარ ყურებს - ანატოლი ბიბილოვი

ოკუპირებული სამხრეთ ოსეთის დე-ფაქტო პრეზიდენტის, ანატოლი ბიბილოვის განცხადებით, ქართული საზოგადოება ხვდება, რომ „სამხრეთ ოსეთსა და აფხაზეთს ისევე ვერ დაინახავს, როგორც საკუთარ ყურებს“. - ამის შესახებ ბიბილოვმა Sputnik Южная Осетия-სთან ინტერვიუში თქვა.

ბიბილოვის მტკიცებით, თბილისმა ოკუპირებულ ცხინვალს როგორც სრულუფლებიან პარტნიორს, ისე უნდა ელაპარაკოს.

ბიბილოვმა აღნიშნა, რომ ოკუპირებული სამხრეთ ოსეთის გავლით სამხრეთ კავკასიის ქვეყნებიდან რუსეთში ტვირთების გადაზიდვა ცხინვალისთვის „ძალიან მნიშვნელოვანია“ ისევე, როგორც „თავად საქართველოსთვის, აზერბაიჯანისთვის და ძალიან მნიშვნელოვანია სომხეთისთვის, ირანისთვის, თურქეთისთვის“. მან დაამატა, რომ „საქართველო საკუთარივე თავის საზიანოდ ცდილობს, ისე გააკეთოს, რომ სამხრეთ ოსეთი ამ პროექტის მიღმა აღმოჩნდეს“,

„სამწუხაროდ, დღეს საქართველოში არ არის ხელმძღვანელი, რომელსაც პოლიტიკური სიმამაცე აქვს, აღიაროს დღევანდელი რეალობა და უახლოეს პერსპექტივაში ასეთი პოლიტიკოსი არ მოსჩანს. მე როგორც მესმის, თვითონ ქართული საზოგადოებაა ამის წინააღმდეგ განწყობილი, თუმცა მათ ესმით, რომ სამხრეთ ოსეთსა და აფხაზეთს ვერ დაინახავს ისევე, როგორც საკუთარ ყურებს. თუმცა, საქართველოს ხელმძღვანელობას უნდა ესმოდეს, რომ სამხრეთ ოსეთს, როგორც სრულფასოვან პარტნიორს უნდა ესაუბროს. ჩვენ სახელმწიფო გვაქვს და ეს გზა სამხრეთ ოსეთის რესპუბლიკასთან სრულფასოვანი პარტნიორობის გარეშე ვერ იფუნქციონირებს“, - დასძინა მან.