პოლიტიკა

ქართული მხარის მტრული საქმიანობა საფრთხეს უქმნის 2012 წელს დაწყებული ურთიერთობების ნორმალიზების პროცესს - გრიგორი კარასინი თბილისს აფრთხილებს

რუსეთის საგარეო საქმეთა მინისტრის მოადგილემ, გრიგორი კარასინმა საქართველოს ხელისუფლება გააფრთხილა, რომ ქართული მხარის „მტრული მოქმედებები“ საერთაშორისო არენაზე საფრთხეს უქმნის 2012 წელს ქვეყნებს შორის დაწყებული ურთიერთობების ნორმალიზების პროცესს. ამის შესახებ მან გამოცემა „იზვესტიას“ განუცხადა.

კითხვაზე, წელს წაიწია თუ არა წინ რუსულ-ქართული ურთიერთობების დარეგულირების პროცესმა, კარასინმა უპასუხა, რომ პოზიტიური ტენდენციები არ შეინიშნება.

„პოლიტიკურ სფეროში, სამწუხაროდ, პოზიტიური ტენდენციები არ შეინიშნება. თბილისი დიპლომატიური ურთოერთობების აღდგენაზე ისევ არ მიდის, აგრძელებს ჩვენთვის მტრულ საქმიანობას საერთაშორისო მოედნებზე, ხალისით მონაწილეობს რუსეთის შემაკავებელ ნატო-ს სტრატეგიაში.

პირდაპირ ვაფრთხილებთ ქართველ პარტნიორებს, რომ ასეთი ქცევა საფრთხის ქვეშ აყენებს 2012 წელს დაწყებული ურთიერთობების ნორმალიზების პროცესს, რისი შედეგებით დღეს სარგებლობენ ორივე ქვეყნის მოქალაქეები“, -განაცხადა კარასინმა.