პოლიტიკა

„ქართული ოცნება” განწირულია ოპოზიციაში გადასვლისთვის - გიორგი კანდელაკი

“რაც უნდათ, ის დაგვიძახონ. ეს ვერ უშველის მათ გარდაუვალი მარცხისგან და ჩვენი ხალხის ნების განხორციელებისგან”, - ამის შესახებ “ევროპული საქართველოს” წევრმა, გიორგი კანდელაკმა განაცხადა.

მისი თქმით, “ქართული ოცნების” რიტორიკა ხშირად არაცივილურ და ველურ ქცევაში გადაიზრდება.

“საზოგადოების კონსენსუსი იმის შესახებ, რომ ეს გვერდი ჩვენს ისტორიაში დავხურეთ და “ქართული ოცნება” და ივანიშვილი უნდა გავისტუმროთ ოპოზიციაში, ეს კონსენსუსი იმდენად თვალშისაცემი და ჩამოყალიბებულია, რაც არ უნდა გაააკეთოს “ქართულმა ოცნებამ”, ჩვენი ქვეყნის მოქალაქეები საკუთარ ნებას მაინც აღასრულებენ და “ქართული ოცნება” მაინც განწირულია ოპოზიციაში გადასვლისთვის. 8 მარტის შეთანხმება შესრულებული არაა და პოლიტპატიმარი გიორგი რურუა, რომელიც იყო შეთანხმების ნაწილი, რჩება პატიმრობაში”,- განაცხადა კანდელაკმა.

ცნობისთვის, დღეს ფრაქცია “ნაციონალური მოძრაობის” თავმჯდომარემ რომან გოცირიძემ განაცხადა, რომ “ქართული ოცნების“ ლიდერებისგან ოპოზიციის მიმართ შეურაცხმყოფელი, სიძულვილის ენით გამოთქმული ეპითეტები ისმის და შესაძლოა, ამ საკითხზე სასამართლოს მიმართონ.