საზოგადოება

ქართველი ემიგრანტები ბერძნულ მედიას ცრუ ინფორმაციის გავრცელებაში ადანაშაულებენ

საბერძნეთში მცხოვრები ქართველი ემიგრანტები ადგილობრივი მედიის წინააღმდეგ ჩივილს აპირებენ და მოითხოვენ საჯარო ბოდიშის მოხდას. საქმე ეხება ბერძნულ მედიაში გავრცელებული 8 ქართველი ემიგრანტის ფოტოს, რომლებზეც ამტკიცებდნენ, რომ ადგილობრივი პოლიცია მათ 85 წლის მოხუცის დაყაჩაღებასა და წამებაში ადანაშაულებდა. მედიის ინფორმაციით, ქართველების კრიმინალურმა დაჯგუფებამ მარტოხელა მოხუცი 50 ევროს გამო დააუთოვეს.

ემიგრანტი სოფიო საკანდელიძის თქმით, ცრუ ინფორმაცია გავრცელდა, რომ ქართველი ქალები საგადასახოს თანამშრომლების სახით პოტენციურ მსხვერპლს ეძებდნენ.

„იყო ისეთი ინფორმაცია, თითქოს ჩვენ ქალები დავდიოდით, თითქოს საგადასახადოდან ვიყავით, ხოლო თუ შევხედავდით და იყვნენ მოხუცებულები, მერე ვეუბნებოდით ბიჭებს. ესეც ცრუ ინფორმაციაა“, -უთხრა საკანდელიძემ „რუსთავი 2“-ს.

ის მოუწოდებს ბერძნულ მედიას, უარყოს მათ მიერ გავრცელებული ინფორმაცია.

„ვართ უდანაშაულო ადამიანები და როგორც გამოგვაქვეყნეს დამნაშავეებად, , ისე გამოგვაქვეყნონ, როგორც უდანაშაულოები“, -თქვა ქართველმა ემიგრანტმა.

ემიგრანტები ერთ უზუსტობაზე საუბრობენ, რომელსაც ბერძნულ მედიას გამოეპარა. კერძოდ, საბერძნეთში მცხოვრები 8 ქართველი პოლიციამ ქურდობისა და ქურდობის მცდელობის ბრალდებით 18 ოქტომბერს დააკავა, ხოლო 85 წლის მოხუცის წამების ფაქტი 27 ოქტომბერს მოხდა.

ემიგრანტები საქართველოს საკონსულოს მუშაობით არიან უკმაყოფილო და საელჩოს უყურადღებობაში ადანაშაულებენ, რასაც საქართველოს დიპლომატიური წარომადგენლობა უარყოფს.