უახლესი ამბები
- 26.04.2024 18:36ჩვენი გზა უნდა მიდიოდეს ევროპაში ორივესი ერთად, მაგრამ რუსეთისკენ მიდიხართ, რუსეთში მიგვათრევთ - ლილე ლიპარტელიანი `ოცნებას`
- 26.04.2024 18:19ლექტორის მკვლელობის ფაქტზე სასამართლომ ორ პირს 20-20 წლით თავისუფლების აღკვეთა შეუფარდა
- 26.04.2024 18:1015 პარტნიორი უნივერსიტეტი, 140-მდე სტიპენდიატი - საქართველოს ბანკის სასტიპენდიო პროგრამის გამარჯვებულები ცნობილია
- 26.04.2024 17:3328 აპრილს თითოეული ქართველის ადგილი რუსთაველზეა - ლევან ხაბეიშვილი
- 26.04.2024 15:32მინდა ვთხოვო და მოვუწოდო ყველა მასწავლებელს - უთხრან არა საქართველოს რუსიფიკაციას და ევროკავშირისგან დაშორებას - ნანა ტოხვაძე
- 26.04.2024 15:1930 წელი მივდიოდით ერთი მიმართულებით და ახლა აღმოჩნდა, რომ უნდა წავიდეთ სხვა მხარეს, რაც, ჩემი აზრით, არ წაადგება ჩვენი ქვეყნის პერსპექტივებს - თედო ჯაფარიძე
- 26.04.2024 14:12თბილისიდან-ბათუმამდე მგზავრობა 3 საათსა და 30 წუთში იქნება შესაძლებელი
არქივი
პოლიტიკა
გიორგი ამილახვარმა ევროკომისარ ილიანა ივანოვასთან შეხვედრა გამართა
საქართველოს განათლებისა და მეცნიერების მინისტრმა გიორგი ამილახვარმა, ბრიუსელში სამუშაო ვიზიტის ფარგლებში, ინოვაციის, კვლევის, კულტურის, განათლებისა და ახალგაზრდობის საკითხებში ევროკომისარ ილიანა ივანოვასთან შეხვედრა გამართა. აღნიშნულის შესახებ ინფორმაციას განათლებისა და მეცნიერების სამინისტრო ავრცელებს.
უწყების მიერ გავრცელებული ინფორმაციის თანახმად, გიორგი ამილახვარმა ევროკომისარს თანამდებობაზე დანიშვნა პირადად მიულოცა, მადლობა გადაუხადა მას და ევროკომისიას საქართველოსთვის კანდიდატის სტატუსის მინიჭების შესახებ პოზიტიური რეკომენდაციისთვის.
„მინისტრმა იმედი გამოთქვა, რომ ევროპის ლიდერების მხრიდან ასეთი მხარდაჭერა და ბოლო წლებში გადადგმული მნიშვნელოვანი ნაბიჯები საქართველოსთვის სტატუსის მინიჭებით დაგვირგვინდება.
გიორგი ამილახვარმა ყურადღება ევროკავშირის მხრიდან განათლებისა და მეცნიერების სფეროების ხელშეწყობის მნიშვნელობაზე გაამახვილა და შეხვედრის მონაწილეებს დეტალური ინფორმაცია მიაწოდა საქართველოს განათლებისა და მეცნიერების სამინისტროსა და ევროკავშირის უნიკალური პროექტის „ევროპის სკოლა – თბილისის“ შესახებ. მისი თქმით, ევროპის სკოლის იდეის განხორციელება, რომელიც საქართველოში საერთაშორისო სტანდარტების შესაბამისი სასწავლო დაწესებულების დაარსებას ითვალისწინებს, უმნიშვნელოვანესი წინგადადგმული ნაბიჯია ევროკავშირისკენ მიმავალ გზაზე. სკოლის მშენებლობა აქტიურად მიმდინარეობს და ის მომავალი სასწავლო წლისთვის უკვე გაიხსნება.
მინისტრმა იმ მნიშვნელოვან რეფორმებზე ისაუბრა, რომლებიც განათლებისა და მეცნიერების სისტემაში მიმდინარეობს. მან განსაკუთრებით გამოყო განათლების ბიუჯეტის უპრეცედენტო ზრდა, საგანმანათლებლო ინფრასტრუქტურის განახლება, მასწავლებელთა ანაზღაურების ზრდა, პედაგოგთა კვალიფიკაციის ამაღლების მხარდაჭერა, პროფესიული განათლების განვითარების ახალი ხედვა და სისტემაში კერძო სექტორის აქტიური ჩართულობის ხელშეწყობა. ამასთან, სტიპენდიატთა რაოდენობისა და სახელმწიფო სტიპენდიის ოდენობის გაორმაგება და დისტანციური სწავლების მიმართულებით დაგეგმილი სიახლეები.
გიორგი ამილახვრის განცხადებით, სამინისტროს ერთ-ერთ მთავარ პრიორიტეტი უმაღლესი განათლების ინტერნაციონალიზაციის მხარდაჭერაა. კერძოდ, აქტიურად გრძელდება მუშაობა, საზღვარგარეთის უნივერსიტეტებთან თანამშრომლობით, ერთობლივი ორმაგი ხარისხის საგანმანათლებლო პროგრამების შემუშავების კუთხით.
როგორც მინისტრმა აღნიშნა, მომავალი წლიდან განათლებისა და მეცნიერების სამინისტროს ახალგაზრდობის მიმართულება ემატება. მან სრული მზაობა გამოთქვა ამ კუთხით ევროკავშირთან თანამშრომლობის გაძლიერებასა და ერთობლივი პროექტების განხორციელებაზე.
შეხვედრის მონაწილეებმა საქართველოსთვის, როგორც პოტენციური კანდიდატი ქვეყნისთვის, Erasmus + პროგრამის ყველა კომპონენტის ხელმისაწვდომობის საკითხი განიხილეს და ამ მიმართულებით სამომავლო გეგმებზე იმსჯელეს. მინისტრმა ევროკომისარს Erasmus+ პროგრამის ყველა კომპონენტის განხორციელებისთვის საჭირო ვალდებულების აღების მიმართულებით სრული მზაობა დაუდასტურა. მისი თქმით, Erasmus+ პროგრამის ფარგლებში არსებული ინიციატივები, უნიკალურ შესაძლებლობას მისცემს ქართველ სტუდენტებს, ევროპელ თანატოლებთან ერთად მონაწილეობა მიიღონ სხვადასხვა საგანმანათლებლო და კულტურულ აქტივობაში.
შეხვედრის დასასრულს, მხარეებმა ევროკომისიის რეკომენდაცია საქართველოსთვის კანდიდატის სტატუსის მინიჭების შესახებ დადებითად შეაფასეს და მისი ისტორიული მნიშვნელობა აღნიშნეს.
თავის მხრივ, ევროკომისარმა ილიანა ივანოვამ მადლობა გადაუხადა მინისტრს მჭიდრო თანამშრომლობისთვის და მხარდაჭერა აღუთქვა ერთობლივი საგანმანათლებლო პროექტების განხორციელების საქმეში. მან დადებითად შეაფასა განათლების მინისტრის მიერ გადადგმული ნაბიჯები და ის რეფორმები, რომლებიც განათლების სისტემის ყველა საფეხურზე მიმდინარეობს“,- აღნიშნულია ინფორმაციაში.