პოლიტიკა

რესპუბლიკურმა პარტიამ 9 საარჩევნო ოლქში მაჟორიტარობის კანდიდატი ქალები წარადგინა

მეტი ქალი პოლიტიკაში, მეტი ქალი ქართულ პოლიტიკაში, მეტი რესპუბლიკელი ქალი ქართულ პოლიტიკაში - ამ ლოზუნგით, რესპუბლიკური პარტიის ერთ-ერთმა ლიდერმა ლევან ბერძენიშვილმა მაჟორიტარი-დეპუტატიბის კანდიდატი ქალები დაასახელა.

ზესტაფონში (52-ე ოლქი) რესპუბლიკური პარტიის მაჟორიტარი-დეპუტატობის კანდიდატი თინა ხიდაშელი იქნება. ბათუმში (- 69-ე ოლქი)ხათუნა სამნიძე, ფოთში (61-ე ოლქი) ლელა ებრალიძე, ოზურგეთში (59-ე ოლქი) ნინო გოგუაძე, ქუთაისში (48-ე ოლქი) ნატო ქათამაძე, ხაშურში (43-ე ოლქი) ირინა გელაშვილი, დუშეთი, ყაზბეგი, თიანეთში (38-ე ოლქი) ლია როინიშვილი, საბურთალოს მე-4 ოლქში თამარ ხიდაშელია წარდგენილი, ხოლო მთაწმინდის 1-ელ ოლქში რესპუბლიკელების მაჟორიტარი დეპუტატობის კანდიდატი თამარ კორძაია იქნება.

ლევან ბერძენიშვილის თქმით, აღნიშნულ კანდიდატებს ბრძოლისუნარიანობა გამოარჩევთ.

ბერძენიშვილმა კანდიდატების წარდგენისას რესპუბლიკელების საარჩევნო სლოგანზე - ,,გავთავისუფლდეთ“ გაამახვილა ყურადღება და აღნიშნა, რომ სხვა ბევრ სტერეოტიპთან ერთად, უნდა გავთავისუფლდეთ შეხედულებისგან, რომ ქალის ადგილი პოლიტიკაში არ არის.

,,ერთ-ერთი სტერეოტიპი გვეუბნება, რომ პოლიტიკაში ქალის ადგილი არ არის და მისი ადგილი არის სამზარეულოში, რაც ღრმად არასწორი აზრია. მეტი ქალი პოლიტიკაში - ეს არის ლოზუნგი, რომლითც ჩვენ გამოვდივართ დღეს. მეტი ქალი პოლიტიკაში - ეს ნიშნავს მეტ სიმტკიცეს, ამავე დროს, ეს ნიშნავს მეტ სირბილეს მოპყრობაში, ეს ნიშნავს მეტ სოლიდარობას, ეს ნიშნავს მშვიდობას, ეს ნიშნავს ბავშვებისა და ახალგაზრდების უკეთეს დანახვას, ნიშნავს მრავალფეროვნებას და ბოლოსდაბოლოს, ეს ნიშნავს კონკურენციას მამაკაცებსა და ქალებს შორის, რომლის დროსაც იზრდება პოლიტიკის ხარისხი“, - განაცხადა ლევან ბერძენიშვილმა.

მარი ნამგალაძე