პოლიტიკა
როდესაც თქვენ ამ რეკომენდაციის წინააღმდეგნი ხართ, თქვენ ხელს აფარებთ და ადვოკატირებას უწევთ შსს-სა და პროკურატურას - სერგო რატიანი „ქართული ოცნების“ წევრებს
ხორავას ქუჩაზე მოზარდების მკვლელობის საქმის შემსწავლელი დროებითი საპარლამენტო საგამოძიებო კომისიის წევრმა სერგო რატიანმა კომისიაში შემავალი საპარლამენტო უმრავლესობის წევრები დაადანაშაულა, რომ ისინი ხელს აფარებენ შსს-სა და პროკურატურას და ამის გამო ეწინააღმდეგებიან „ევროპული საქართველოს“ რეკომენდაციას, რომ შსს-მ დაუყოვნებლივ დაიწყოს გამოძიება გ.მ.-ს დაჭრის ფაქტზე.
„დღეს, როდესაც თქვენ ამ რეკომენდაციის წინააღმდეგნი ხართ, თქვენ უბრალოდ იმას კი არ ამბობთ, რომ გამოძიება დაწყებულია, დღეს თქვენ ხელს აფარებთ და ადვოკატირებას უწევთ ფაქტობრივად შსს-სა და პროკურატურას. ძალიან არ მინდა, რომ თქვენ იყოთ ასეთ ვითარებაში, ამიტომ დაფიქრდით, როდესაც იცავთ პროკურატურისა და შსს-ს ხაზს, რას აკეთებთ“, - მიმართა რატიანმა თავის კოლეგებს საპარლამენტო უმრავლესობიდან კომისიის დღევანდელ სხდომაზე.
რატიანის განმარტებით, რეკომენდაცია იმაზე ამახვილებს ყურადღებას, რომ გამოძიება არასწორი მიმართულებით წავიდა.
„გ.მ. არის ის ადამიანი, რომელიც უშუალოდ შემხებლობაშია დავით სარალიძესთან, რომელიც იყო ფარდულში და მის ტანსაცმელზე არის დავით სარალიძის სისხლი. ხოლო ის, ვინც გ.მ. დაჭრა, ხედავს ყველაფერს. ის, რომ გამოძიება არ დაინტერესებულა და ხელი გადააფარა ამ ფაქტს, ნიშნავს იმას, რომ არასწორი მიმართულებით წავიდა. გამოძიება არ დაინტერესდა იმ ადამიანებით, რომელიც უშუალოდ უყურებს მთელ იმ ამბავს, რაც ფარდულში ხდება. შესაბამისად, რეკომენდაცია ეხება არა მხოლოდ იმას, რომ გ.მ-ს დაჭრის ფაქტზე გამოძიება დაიწყოს, არამედ ეხება იმას, რომ გამოძიება არასწორი მიმართულებით წავიდა“, -აღნიშნა რატიანმა.