უახლესი ამბები
- 01.05.2024 16:15მჯერა ქართველი ხალხის, ის საქართველოს ევროპულ გზას დაიცავს - ევროპარლამენტარი
- 01.05.2024 15:39ძალადობა უნდა შეწყდეს - საქართველოში გერმანიის ელჩი
- 01.05.2024 15:27ხელისუფლება შევიდა უმძიმეს და არასაჭირო პროცესში და ვფიქრობ, მას მოუწევს დიდი პოლიტიკური ფასის გადახდა - გიორგი კვირიკაშვილი
- 01.05.2024 15:182 მაისიდან 6 მაისამდე საქართველოში ამინდი გაუარესდება
არქივი
პოლიტიკა
როგორ შეიძლება, აქამდე მიგვეყვანა საქმე , რომ ზვიად გამსახურდიას შვილები საშიმშილოდ დამსხდარიყვნენ საქართველოს პროკურატურის მისაღებში - როსტომ ჩხეიძე
მწერალი როსტომ ჩხეიძე გამოეხმაურა საქართველოს პირველი პრეზიდენტის, ზვიად გამსახურდიას შვილების, კონსტანტინე და ცოტნე გამსახურდიების გადაწყვეტილებას პროკურატურის მისაღებში შიმშილობის დაწყებასთან დაკავშირებით.
„როგორ შეიძლება, აქამდე მიგვეყვანა საქმე - ზვიად გამსახურდიას შვილები, კონსტანტინე და ცოტნე, საშიმშილოდ დამსხდარიყვნენ საქართველოს პროკურატურის მისაღებში, ბოლოს და ბოლოს ოფიციალურად გამოიძიეთ საქართველოს პირველი პრეზიდენტის მკვლელობაო.
ოფიციალურად, თორემ ყველაფერი უკვე გარკვეულიცაა და დადასტურებულიც - მხოლოდღა პროკურატურის დასკვნა აკლია.
აქამდე მისულიყო საქმე და... სასიკეთო და სანუგეშო მაინც არა ჩანს, რა.
ეს ყოველივე ჩვენი საზოგადოების ბრალია, ჩვენი უპატიებელი დანაშაული, ხელისუფლებამ საშველი რომ არა და არ დააყენა სიმართლის ოფიციალურ გამოცხადებას.
ზვიად გამსახურდია ხომ მარტო თავისი შვილების მამა არ არის. არამედ მამა იმ ახალამოგებული სახელმწიფოსი, რომელშიაც ვცხოვრობთ და დიდი იმედებითაც მივისწრაფით, საკაცობრიო ცხოვრების უშუალო მონაწილენი რომ გავხდეთ.
ეს სახელმწიფო მან კიდეც შექმნა და თავისი სისხლითაც დაჰკირა, სისხლით, რომელიც - აშოტ კურაპალატის მკვლელობისა არ იყოს - აწცა იხილვების ვითარცა ახალი.
ამ მკვლელობის ოფიცილურ გამოცხადებას საშველი არც დაადგება, ვიდრე ეს ხელისუფლება, ეს ოდიოზური პოლიტიკური სისტემა არ გადაილეკება, მერე კი დადგება ხანა პირუთვნელი მსჯავრისა ყველასა და ყველაფრის მიმართ, და ზვიად გამსახურდიას მკვლელობის ოფიციალური ვერსიაც იქნება ისეთი და მხოლოდ ისეთი, რაც გონიერ ადამიანებს ისედაც კარგად მოეხსენებათ.
უილიამ შექსპირისა არ იყოს:
ბოროტი საქმე დღის სინათლეს ვერსად წაუვა,
თუნდ დასაფარად დედამიწა გადაეფაროს!..“, - დაწერა ჩხეიძემ ფეისბუკის საკუთარ გვერდზე.
ცნობისთვის, კონსტანტინე და ცოტნე გამსახურდიები ზვიად გამსახურდიას საქმის დაუყოვნებლივ გამოძიებასა და იმ პირთა დასჯას ითხოვენ, რომლებიც საქართველოს პირველი პრეზიდენტის დევნასა და მკვლელობაში მონაწილეობდნენ. დამნაშავეთა დასჯის მოთხოვნით პროკურატურის მისაღებში მათ შიმშილობა დაიწყეს.