პოლიტიკა

როგორც ჩანს, ჩვენი ბიუჯეტი არაა მიმართული ქვეყნის თავდაცვისუნარიანობის გაძლიერებისკენ - სალომე სამადაშვილი

„ერთიანი ნაციონალური მოძრაობის“ წევრის, სალომე სამადაშვილის განცხადებით, მას შეკითხვები აქვს თავდაცვის სამინისტროს ბიუჯეტთან დაკავშირებით. მისი შეფასებით, 2018 წლის ბიუჯეტის პროექტი არ ითვალისწინებს ქვეყნის თავდაცვისუნარიანობის გაძლიერებას.

„აქ საუბარი არ არის მხოლოდ იმაზე, თუ ნომინალურად რა ციფრებშია ასახული თავდაცვის ბიუჯეტი, არამედ, უპირველეს ყოვლისა, ჩვენი შეკითხვები უკავშირდება იმას, თუ როგორ ნაწილდება ეს ბიუჯეტი, რეალურად რა სახსრებია გამოყოფილი იმისთვის, რომ ჩვენი სამხედრო ინფრასტრუქტურა, ჩვენი თავდაცვითი შესაძლებლობები გაძლიერდეს. სამწუხაროდ, როგორც ჩანს, დღევანდელ პირობებში ჩვენი ბიუჯეტი ძირითადად იხარჯება სოციალური მიმართულებით და ეს არანაირად არ უზრუნველყოფს ამ ქვეყნის თავდაცვისუნარიანობის გაძლიერებას. ამიტომ, ძალიან მწვავე შეკითხვები მექნება მე თავდაცვის კომიტეტის მოსმენაზე და ვნახოთ, რა პასუხები აქვს ამაზე ხელისუფლებას“, -თქვა დეპუტატმა.

შეგახსენებთ, პარლამენტში 2018 წლის ბიუჯეტის პროექტის განხილვა მიმდინარეობს.

ანა მებურიშვილი