პოლიტიკა
რუსეთის დელეგაციას რეკომენდაცია გავუწიეთ - გიგი წერეთელი
პარტია ერთიანი ნაციონალური მოძრაობის წევრი, პარლამენტარი გიგი წერეთელი ადასტურებს, რომ ეუთოს საპარლამენტო ასამბლეის მოთხოვნა იყო, რომ ყველა ქვეყნის დელეგაცია იქნას დაშვებული თბილისში დაგეგმილ ფორუმზე.
ამის შესახებ წერეთელმა ჟურნალისტებს იმ საკითხის კომენტირებისას განუცხადა, რომლის მიხედვით, ეუთოს საპარლამენტო ასამბლეაში რუსეთის დელეგაცია მიიღებს მონაწილეობას, რომლის შემადგენლობაში არიან დეპუტატები, რომლებსაც საქართველოს კანონი „ოკუპაციის შესახებ“ აქვთ დარღვეული.
„მოთხოვნა არის ის, რომ ყველა დელეგაციის ყველა წევრი, აქ მხოლოდ რუსეთზე არ არის საუბარი, იქნას დაშვებული ამ ფორუმზე და ჩვენ ყოველთვის ვამბობდით, რომ თუ რამე გვაქვს სათქმელი მტკიცედ, პრინციპულად , კრიტიკულად- ამას ვეტყვით მათი თანდასწრებით. თუმცა ასევე რეკომენდაციას ვუწევთ ყოველთვის დელეგაციებს, მათ შორის რუსეთის დელეგაციას გავუწიეთ რეკომენდაცია, რომ დააკომპლექტონ ისეთი ადამიანებით, ვისაც არ აქვს ეს კანონი დარღვეული“,-განაცხადა წერეთელმა.
მისი თქმით, ზოგიერთი წევრი, რომელსაც ეს კანონი აქვს დარღვეული, რუსეთის დელეგაციის შემადგენლობაში აღარ არის.
„ზუსტად არ ვიცით რა ნიშნით, იმიტომ რომ ყველა ინფორმაციაზე წვდომა არ გვაქვს. ვინც არის მათში შესაძლებელია იყვნენ ისეთი ადამიანები ვისაც „ოკუპაციის შესახებ“ კანონი დარღვეული აქვს“,-განაცხადა წერეთელმა.
მონიკა დავლიანიძე