პოლიტიკა

რუსთავი 2 მკაფიოდ ემიჯნება სახელმწიფო გადატრიალებას - ნიკა გვარამია

მინდა, ციტირება მოვახდინო ირაკლი ალასანიას ფრაზის, რომელიც მე მითხრა: წელში გადავტეხავ ივანიშვილს, თუ ხმებს მომპარავს - განაცხადა რუსთავი 2-ის გენერალურმა დირექტორმა, ნიკა გვარამიამ ტელეკომპანიაში დღეს გამართულ ბრიფინგზე და იმ აუდიოჩანაწერის გავრცელებას გამოეხმაურა, რომელშიც სავარაუდოდ საქართველოს ექს-პრეზიდენტი, მიხეილ სააკაშვილი და „ერთიანი ნაციონალური მოძრაობის“ წევრები რევოლუციურ სცენარს განიხილავენ.

როგორც გვარამიამ აღნიშნა, საკუთარი მხარდამჭერების ხმების დაცვაში უკანონო არაფერია და არც ის, თუ როგორი ფრაზებით გადმოსცემენ ამას ადამიანები.

,, მე მინდა, ციტირება მოვახდინო ირაკლი ალასანიას ფრაზის, რომელიც მე მითხრა: ,,წელში გადავტეხავ ივანიშვილს, თუ ხმებს მომპარავს.’’ რა არის ეს რევოლუციისკენ მოწოდებაა, ივანიშვილის კადაფიზაციაა, მკვლელობის მცდელობა თუ რა? არაფერი ამგვარი, არც სახელმწიფო გადატრიალება, ეს არის პატრიოტი პოლიტიკოსის ნათქვამი, როგორ დაიცავს ის თავის ხმებს. ეს ნებადართულია და როგორი სიტყვებით გამოხატავენ პირად საუბრებში ადამიანები საკუთარ აზრებს, ეს მხოლოდ მათი საქმეა’’, - განაცხადა ნიკა გვარამიამ.

ამასთან, რუსთავი 2-ის გენერალურმა დირექტორმა პოლიტიკოსებსა და საზოგადოებას მოუწოდა გაემიჯნონ სახელმწიფო გადატრიალების ხსენებასაც კი და განმარტა ,რომ რევოლუცია და სახელმწიფო გადატრიალება სხვადასხვა რამაა.

,,კანონიერი პროტესტის გზები ამ ქვეყანაში ჯერჯერობით დაშვებულია და თუ ვინმეს ჰგონია, რომ რევოლუცია, მაგალითად ,,ვარდების რევოლუციის’’ კონტექსტში აკრძალული ქმედებაა, ძალიან ცდება. ეს არ არის სახელმწიფო გადატრიალება. ეს არის ხალხის მეშვეობით საარჩევნო ხმების დაცვა, რაც ამ ქვეყანაში დაშვებულია, ყოველთვის იყო და იქნება. ამას საერთაშორისო კონვენციებიც ამბობს. რაც შეეხება სახელმწიფო გადატრიალებას, მე ეს სიტყვათშეთანხმება მზარავს. მე ვარ ეგრეთ წოდებული ზვიადისტების ოჯახიდან, რომელიც უმძიმესად არის დაზარალებული ერთადერთი სახელმწიფო გადატრიალებით ამ ქვეყნის ისტორიაში, რომელიც იყო 1991 წელს.

პირობას ვდებ, იქ, სადაც მე ვიქნები, არ იქნება სახელმწიფო გადატრიალების ხელშეწყობა არასდროს, არცერთ ვითარებაში, არცერთი მიზეზით. რუსთავი 2 მკაფიოდ ემიჯნება სახელმწიფო გადატრიალებას და მოუწოდებს ყველა პოლიტიკურ აქტორს და საზოგადოებრივ აქტორებს, გაემიჯნონ ცალსახად სახელმწიფო გადატრიალების ხსენებასაც კი’’, - განაცხადა ნიკა გვარამიამ.

ნინო ექვთიმიშვილი