საზოგადოება

რუსთავის მერი გიორგი ჭანტურიას ადვოკატის ბრალდებებს გამოეხმაურა

რუსთავის მერი ირაკლი ტაბაღუა გამოეხმაურა ყოფილი პროკურორის, გიორგი ჭანტურიას ადვოკატის მოთხოვნას რუსთავის ე.წ. სტამბოლის ბაზრის მეწილის, სამსონ ქუთათელაძის მკვლელობის საქმეზე მისი დაკითხვის შესახებ.

ტაბაღუამ ალექსანდრე კობაიძის მიერ გაჩენილ კითხვებს აბსურდული უწოდა.

რუსთავის მერმა ასევე უპასუხა ადვოკატის კითხვას, თუ როგორ აღმოჩნდა ტაბაღუა ქუთათელაძის გარდაცვალების ფაქტიდან ნახევარ საათში ბაზრობის ტერიტორიაზე.

„მერიის ცხელი ხაზი მუშაობს და ძალიან ხშირად გვიწევს ადგილებზე გასვლა. რამდენიმე ტრაგიკული შემთხვევა იყო და ადგილზე ვიმყოფებოდი“, - განაცხადა ტაბაღუამ.

რუსთავის მერია ასევე არის რუსთავის ე.წ. სტამბოლის ბაზრის მეწილე და უშუალოდ ჩართულია ობიექტის მართვის პროცესში.

ყოფილი პარლამენტარი და ეროვნული გვარდიის ყოფილი სარდალი, გენერალი სამსონ ქუთათელაძე მოკლული საკუთარ კაბინეტში 15 იანვარს იპოვეს.