საზოგადოება

საარჩევნო დავებზე ყველა დაინტერესებული პირი ინფორმირებული იქნება - ნინო გვენეტაძე

საქართველოს უზენაესი სასამართლოს თავმჯდომარის ნინო გვენეტაძის ინფორმაციით, წლევანდელ ადგილობრივი თვითმმართველობის არჩევნებთან დაკავშირებით წარმოქმნილ დავებზე მიღებული გადაწყვეტილებები ფართოდ იქნება გაშუქებული. მან ამის შესახებ ბათუმში თქვა, სადაც ესწრება მოსამართლეებთან შეხვედრას საარჩევნო საკითხებთან დაკავშირებით.

„უკვე მეორე წელია, ცენტრალურ საარჩევნო კომისიასთან ვთანამშრომლობთ. ჩვენ მოდელი დავნერგეთ, რომელიც გამოადგება საზოგადოებას. ყველა დაინტერესებული პირი ინფორმირებული იქნება, რაც გულისხმობს საარჩევნო დავების შესახებ მიღებული გადაწყვეტილების განზოგადებას და შედეგების გამოქვეყნებას.

წელს უკვე ადგილობრივი თვითმმართველობის არჩევნებთან დაკავშირებით გვყავს დონორები, რომლებიც ეთანხმებიან ჩვენს პოზიციას და საარჩევნო დავებთან დაკავშირებული გადაწყვეტილებები იქნება ფართოდ გაშუქებული“, - თქვა გვენეტაძემ

ანა მებურიშვილი