პოლიტიკა
საერთო წესებზე შეთანხმების მიზნით „ქართული ოცნება“ შიდა პარტიულ დოკუმენტს მიიღებს - სოფიო კილაძე
საპარლამენტო უმრავლესობის წევრის, სოფო კილაძის ინფორმაციით, საერთო წესებზე შეთანხმების მიზნით „ქართული ოცნება“ შიდა პარტიულ დოკუმენტს მიიღებს.
დეპუტატის თქმით, აღნიშნული დოკუმენტი ნებაყოფლობითობის პრინციპზე იქნება დაფუძნებული.
„ცხადია, ყველას აქვს შესაძლებლობა გამოხატოს საკუთარი აზრი გუნდის შიგნით, თუ გუნდის გარეთ. საუბარი არის კონკრეტულ წესებზე, რომელზეც ნებაყოფლობით ყველანი ერთად შევთანხმდებით. აქ მხოლოდ ნებაყოფლობითობაზეა საუბარი. ნებისმიერ განვითარებულ ქვეყანაში არსებობს თამაშის წესები პოლიტიკური პარტიის შიგნით. ამ წესებს სცემენ პატივს და ეს არ ითვლება დემოკრატიის შეზღუდვად.
არსებობს ელემენტარული წესები, რომელსაც ყველამ პატივი უნდა სცეს. საუბარია პარტიის შიდა დოკუმენტზე, რომელიც იქნება ყველას შეთანხმების საგანი ნებაყოფლობითობის საფუძველზე. უნდა არსებობდეს წესები, რომ ადამიანებმა ერთმანეთს შეურაცხყოფა არ მიაყენონ – ეს არის ელემენტარული ჭეშმარიტება“, – აცხადებს სოფიო კილაძე.