პოლიტიკა

საია-ს ინფორმაციით, არჩევნების მეორე ტურის გასაყალბებლად ხელისუფლება ყალბ პირადობის მოწმობებს ამზადებს

საქართველოს ახალგაზრდა იურისტთა ასოციაციის ინფორმაციით, ხელისუფლება საპრეზიდენტო არჩევნების მეორე ტურის გასაყალბებლად ემზადება.

როგორც დღეს გამართულ ბრიფინგზე საია-ს აღმასრულებელმა დირექტორმა ირმა პავლიაშვილმა განაცხადა, ორგანიზაციას დაუკავშირდა სახელმწიფო სერვისების განვითარების სააგენტოში დასაქმებული ერთ-ერთი თანამშრომელი, რომელმაც მიაწოდა ინფორმაცია, რომ მიმდინარეობს პირადობის მოწმობების დაბეჭდვა მეორე ტურისთვის.

საია-ს ინფორმაციით, ყალბი პირადობები განკუთვნილია იმისთვის, რომ მოხდეს მისი სალომე ზურაბიშვილის სასარგებლოდ გამოყენება.

„წყაროს ინფორმაციით, ყველა მოწმობა დაიბეჭდება იმ სქემით, რომ ერთი პირზე მოხდეს 5 პირადობის მოწმობა და ამ შეთხვევაში ერთი და იგივე გამეორდება ფოტო, ხოლო სხვა მონაცემები სხვადასხვა იქნება. შემდგომ უკვე შესაბამისი სია გადანაწილდება უბნების და ოლქების მიხედვით,“-განაცხადა ირმა პავლიაშვილმა.

მისივე თქმით, ფაქტი შეიცავს სისხლის სამართლებრივი დანაშაულების ნიშნებს.

როგორც პავლიაშვილმა აღნიშნა, საუბარია როგორც არჩევნების გაყალბებაზე, ასევე დოკუმენტაციის გაყალბებაზე.

საიას წარმომადგენელმა პროკურატურას საკითხით დაინტერესებისკენ მოუწოდა.