კომენტარი

პოლონელ ექიმებზე კვლავ უძრაობაა, სამწუხაროდ, როგორც ევროპელები გვეუბნებიან, ისინი მწარედ მოატყუეს - მიხეილ სააკაშვილის ადვოკატი

პოლონელ ექიმებზე ჩვენ კვლავ უძრაობა გვაქვს – სამწუხაროდ, როგორც ევროპელები გვეუბნებიან, ისინი ძალიან მწარედ მოატყუეს და ყველა ჯერზე ძალიან აბსურდულ ახალ მოთხოვნას და კრიტერიუმს უწესებენ, – ამის შესახებ საქართველოს მესამე პრეზიდენტის ადვოკატმა, შოთა თუთბერიძემ „პალიტრანიუსის“ გადაცემა „ნიუსრუმში“ განაცხადა, რა დროსაც მიხეილ სააკაშვილის მკურნალობის პროცესში პოლონელი ექიმების ჩართვასთან დაკავშირებით ისაუბრა.

მისივე თქმით, პოლონელი ექიმები მიხეილ სააკაშვილის დაცვის მხარის მოთხოვნით არ ჩამოდიან და ეს საკითხი პოლიტიკურ დონეზე შეთანხმების ნაწილია.

„პოლონელ ექიმებზე ჩვენ კვლავ უძრაობა გვაქვს. ხელისუფლებამ ძალიან უხეშად მოიტყუა, როცა ჯერ შეეცადნენ, რომ ეთქვათ, საბუთები არ აქვთ წარმოდგენილიო და მერე, შეეცადნენ, ეს დაცვის მხარისთვის დაებრალებინათ, მაშინ, როცა დაცვის მხარე არაფერ შუაშია. ესენი არ არიან ექიმები, რომლებიც საქართველოში ჩვენი მოწვევით ჩამოდიან. პოლონელი ექიმები პოლიტიკურ დონეზე შეთანხმების ნაწილი იყვნენ და ხელისუფლებამ ჩვენგან მოითხოვა მხოლოდ თანხმობა იმაზე, რომ ექიმები შესულიყვნენ. ყველაფერი მივაწოდეთ, რაც ჩვენგან მოითხოვეს, თუმცა სამწუხაროდ, როგორც ევროპელები გვეუბნებიან, ისინი ძალიან მწარედ მოატყუეს და ყველა ჯერზე ძალიან აბსურდულ ახალ მოთხოვნას და კრიტერიუმს უწესებენ,“ – აღნიშნა თუთბერიძემ.

მისივე თქმით, დაცვის მხარეს მიაჩნია, რომ მიხეილ სააკაშვილის ჯანმრთელობის დაცვისთვის ერთადერთი ეფექტური გზა მისი საზღვარგარეთ სამკურნალოდ გადაყვანაა.