პოლიტიკა
სალომე სამადაშვილმა გია ვოლსკის გენდერული თანასწორობის საბჭოში უჩივლა
„ნაციონალური მოძრაობის“ წევრმა სალომე სამადაშვილმა პარლამენტის ვიცე-სპიკერ გია ვოლსკის გენდერული თანასწორობის საბჭოში უჩივლა. შესაბამისი მიმართვა მან პარლამენტის კანცელარიას უკვე გადასცა.
საქმე ეხება თავდაცვისა და უშიშროების საპარლამენტო კომიტეტის სხდომაზე მომხდარ ინციდენტს, როცა გია ვოლსკიმ სამადაშვილს „გოგო“-თი მიმართა.
„საქართველოში, პოლიტიკაში ქალთა როლის გაძლიერება მნიშვნელოვანი ამოცანაა. პარლამენტში კვოტირების სისტემის შემოღებაზე ვფიქრობთ, რათა პარლამენტში ქალთა თანამონაწილეობა გავაძლიეროთ. სამწუხაროდ, პარლამენტის უმაღლესი თანამდებობის პირებს, მათ შორის გია ვოლსკის არ ესმის, რას ნიშნავს გენდერულად დისკრიმინაციული ენის გამოყენება და კნინობითი ფორმით მიმართვა ქალი კოლეგების მიმართ. გენდერული თანასწორობის საბჭოს მივმართავ, რომ 9 ოქტომბერს მომხდარი ინციდენტი განიხილონ და შესაბამისი რეაგირება მოახდინონ, რადგან ეს მნიშვნელოვანია არა მხოლოდ იმ ქალებისთვის, ვისაც პოლიტიკაში მონაწილეობა სურთ, არამედ ყველა ქალისთვის, ვინც პროფესიულ გარემოში უსაფრთხოდ და დაცულად უნდა იგრძნოს“, -თქვა სამდაშვილმა.
გენდერული თანასწორობის საბჭო ქალთა უფლებებზე მუშაობს. მისი თავმჯდომარე პარლამენტის ვიცე-სპიკერი თამარ ჩუგოშვილია.
შეგახსენებთ, 9 ოქტომბერს 2018 წლის ბიუჯეტის განხილვაზე გია ვოლსკისა და სალომე სამადაშვილს შორის შელაპარაკება მოხდა.
თავდაპირველად სამადაშვილმა კითხვები თავდაცვის სამინისტროს წარმომადგენელს დაუსვა ქვეყნის თავდაცვისუნარინობის გაძლიერების სავარაუდო პერსპექტივის შესახებ, კერძოდ, როგორ აისახება ეს ბიუჯეტზე. ასევე დეპუტატმა ყურადღება გაამახვილა, რომ კრიზისის დროს საქართველომ რუსეთს დახმარება სთხოვა, მიუხედავად იმისა, რომ ის ქვეყნის მთავარ საგარეო საფრთხეს წარმოადგენს
თავდაცვის სამინისტროს წარმომადგენლის პასუხების შემდეგ სიტყვით გამოვიდა გია ვოლსკი, რის შემდეგაც მას სამადაშვილთან კამათი მოუვიდა.
„რა გაყვირებს, გოგო?“, -უთხრა ვოლსკიმ სამადაშვილს, რის გამოც ენმ-ის წევრმა პროტესტის ნიშნად სხდომა დატოვა შეძახილით „გოგოთი მიმართეთ სახლში საკუთარი ოჯახის წევრებს!“.
ანა მებურიშვილი