არქივი
საზოგადოება
სამსონ ქუთათელაძის მკვლელობის საქმის ადვოკატმა რუსთავის მერის დაკითხვა მოითხოვა
ყოფილი პროკურორის, გიორგი ჭანტურიას ადვოკატმა, ალექსანდრე კობაიძემ სამსონ ქუთათელაძის მკვლელობის საქმეზე რუსთავის მერის, ირაკლი ტაბაღუას დაკითხვა მოითხოვა.
ადვოკატის თქმით, ეჭვს ბადებს ის ფაქტი, რომ ქალაქის მერი სამსონ ქუთათელაძის გარდაცვალების ფაქტიდან ნახევარ საათში იმყოფებოდა ბაზრობის ტერიტორიაზე.
„ტაბაღუამ სამ მთავარ კითხვას უნდა გასცეს პასუხი. პირველი, ეს არის, რომ მისი მოსვლისთანავე, რატომ გაათავისუფლა ჭანტურიები. რატომ დანიშნა მისი სახლისკაცი იურისტად, რომელიც მისი ნათესავია. მესამე კითხვაა, ცხონებული სოსო ქუთათელაძის გარდაცვალების ფაქტიდან დაახლოებით ნახევარ საათში, რა უნდოდა დანაშულის ადგილზე,“, - უთხრა კობაიძემ „რუსთავი 2“-ს.
რუსთავის მერია ასევე არის რუსთავის ე.წ. სტამბოლის ბაზრის მეწილე და უშუალოდ ჩართულია ობიექტის მართვის პროცესში.
ყოფილი პარლამენტარი და ეროვნული გვარდიის ყოფილი სარდალი, გენერალი სამსონ ქუთათელაძე მოკლული საკუთარ კაბინეტში 15 იანვარს იპოვეს.