საზოგადოება

საპატრიარქოს დელეგაცია მოსკოვში მიემგზავრება

საქართველოს საპატრიარქოს სამკაციანი დელეგაცია, ერთ კვირაში, მოსკოვში გაემგზავრება.

ამის მიზეზი რუსეთის პატრიარქის ტიტულის აღდგენის 100 წლისთავთან დაკავშირებული ღონისძიებაა, რომელიც 4 დეკემბერს გაიმართება.

მოპატიჟება რუსეთის პატრიარქ კირილის წარმომადგენელმა თბილისში ვიზიტისას რამდენიმე კვირის წინ პირადად ილია მეორეს გადასცა.

ჯანმრთელობის მდგომარეობის გამო, ღონისძიებაზე არ მიემგზავრება თავად საქართველოს პატრიარქი.

დელეგაციას ახალციხის, ტაო კლარჯეთსა და ლაზეთის ეპარქიის მიტროპოლიტი თეოდორე ჭუაძე უხელმძღვანელებს. დელეგაციის შემადგენლობაში ასევე არიან ზუგდიდისა და ცაიშის ეპარქიის მიტროპოლიტი გერასიმე შარაშენიძე, რომელიც იმავდროულად არის საქართველოს საპატრიარქოს საგარეო საქმეთა განყოფილების ხელძღვანელი და ნიკორწმინდელი ეპისკოპოსი ვახტანგ ლიპარტელიანი.

როგორც ჟურნალისტებს დეკანოზმა კახაბერ გოგოტიშვილმა განუცხადა, მოსკოვში ოკუპირებული აფხაზეთსა და ე.წ სამხრეთ ოსეთში ეკლესიებთან დაკავშირებით შექნნილ ვითარებასთან დაკავშირებულ საკითხებიც დაისმება.

„რა თქმა უნდა, დასვამენ ამ საკითხს, აფხაზეთის საკითხსაც და ცხინვალის საკითხსაც ყველა შემთხვევაში დასვამენ, სადაც კი ამის საშუალება მიეცემათ კომპეტენტურ პირებთან. ჩვენ ძალიან დიდი სურვილი გვაქვს და არაერთგზის დავაყენეთ ეს საკითხი, რომ აფხაზეთში და ცხინვალის რეგიონში ჩვენი იურისდიქცია განხორციელდეს. არა მარტო იმით, რომ სიტყვით ვარ აღიარებული, რომ ეს საქართველოს ტერიტორიაა და საქართველოს ეკლესია უნდა ახორციელებდეს იქ მოღვაწეობას, არამედ პრაქტიკული თვალსაზრისით გვქონდეს შეწევნა, თანადგომა იმისა, რომ ქართულ სამღვდელოებას ჰქონდეს შესაძლებლობა მოემსახუროს თავის მრევლს“,- განაცხადა დეკანოზმა კახაბერ გოგოტიშვილმა.

მონიკა დავლიანიძე