საზოგადოება

საპატრიარქოში გარკვეული პირების მიერ მიზანმიმართული ხელისშეშლაა, რომ ოჯახის წევრები პატრიარქს არ შეხვდნენ - ადვოკატი

ე.წ ციანიდის საქმეზე ბრალდებულის, დეკანოზ გიორგი მამალაძის ადვოკატის მიხეილ რამიშვილის განცხადებით, ბრალდებულის ოჯახის წევრბის შეხვედრა პატრიარქთან მიზანმიმართულად ჭიანურდება.

ამის შესახებ რამიშვილმა „ტვ პირველს“ სასჯელაღსრულების დაწესებულებასთან განუცხადა, სადაც დეკანოზის მოსანახულებლად იყო მისული.

„შემიძლია პირდაპირ გითხრათ, რომ საპატრიარქოში გარკვეული პირების მიერ მიზანმიმართული ხელისშეშლაა, რომ ოჯახის წევრები პატრიარქს არ შეხვდნენ. არაერთხელ ყოფილა შემოთავაზება და დაგეგმვა ოჯახის წევრებთან შეხვედრის, მაგრამ როდესაც შეხვედრის დრო რეალურად დგებოდა, იმწუთშივე ხდებოდა ცვლილებები. უფრო გონიერად უნდა მოიქცნენ ის პირები, ვინც ამას მიზანმიმართულად აკეთებენ. არაერთ სასულიერო პირს, რომელსაც უფლება აქვს შევიდეს და მოინახულოს ნებისმიერი პატიმარი, მითუმეტეს მამა გიორგი, უთქვამს, რომ მეუფე იაკობი არ მაძლევს საშუალებას და ნებას, რომ ვინახულო მამა გიორგიო. მე უკვე დიდი ეჭვი მიჩნდება, რომ ძალიან ბევრს ეშინია მამა გიორგისთან საუბრის და ამ ბევრში, მაღალი იერარქიული პირები არიან, სასულიერო პირები“,-განაცხადა მიხეილ რამიშვილმა.

ადვოკატი დარწმუნებულია, რომ პატრიარქს დეკანოზ მამალაძის ერთგულებაში ეჭვი არ ეპარება.

„როდესაც პატრიარქი ჩამობრძანდა გერმანიიდან, მაშინ სულ რამდენიმე წუთით ვნახეთ და გავიმეორებ, რომ მას სხვა პოზიცია ქონდა და დარწმუნებული ვარ, რომ დღესაც იგივე პოზიცია ექნება პატრიარქს. მან ძალიან გარკვევით გვითხრა, რომ მამა გიორგის ორგულობაში ეჭვი ეპარება, წარმოუდგენელია მისთვის.

ვფიქრობ, რომ შეხვედრაზე ადვოკატების მისვლის პრობლემა მხოლოდ და მხოლოდ ერთ რამემ წარმოშვა, რომ ჩვენ შეგვიძლია პატრიარქს სიმართლე თავიდან ბოლომდე ვუთხრათ და ჩემთვის, პირადად ძალიან მიუღებელია, როდესაც საუბრობენ, რომ გამოძიებას ენდობიან.

კი, ბატონო ენდონ, მაგრამ ჯერ ჩვენ მოგვისმინონ“,-აღნიშნა ადვოკატმა.

მონიკა დავლიანიძე