პოლიტიკა

საქართველოს ელჩმა ტაილანდის მეფეს რწმუნებათა სიგელები გადასცა

ტაილანდის სამეფოში საქართველოს საგანგებო და სრულუფლებიანმა ელჩმა არჩილ ძულიაშვილმა (რეზიდენციით ქ. ნიუ დელი) რწმუნებათა სიგელები გადასცა ტაილანდის მეფეს მაჰა ვაჯირალონგკორნ ბოდინდრადებაიავარანგკუნს (His Majesty Maha Vajiralongkorn Bodindradebayavarangkun King of Thailand).

ოფიციალური ცერემონიის დასრულების შემდეგ გამართულ შეხვედრაზე აღინიშნა ორ ქვეყანას შორის არსებული მტკიცე მეგობრული ურთიერთობები, რასაც ადასტურებს ვიზიტების გაცვლის დადებითი დინამიკა. აღსანიშნავია, რომ მიმდინარე წელს საქართველოს ეწვია ტაილანდის პრინცესა მაჰა ჩაკრი სირინდჰორნი (Her Royal Highness Maha Chakri Sirindhron, ხოლო ტაილანდში განხორციელდა საქართველოს საგარეო საქმეთა მინისტრის მოადგილისა და გარემოს დაცვისა და სოფლის მეურნეობის მინისტრის ვიზიტი

მხარეებმა ისაუბრეს სავაჭრო-ეკონომიკური და ტურიზმის სფეროების გაძლიერების მნიშვნელობაზე და ამ მიმართულებით სამომავლო თანამშრომლობის კონკრეტული გზები განიხილეს. ხაზი გაესვა, რომ ორივე ქვეყანაში იგეგმება საპატიო კონსულის ხელმძღვანელობით საკონსულო დაწესებულებების გახსნა. გამოითქვა იმედი, რომ ორ ქვეყანას შორის თანამშრომლობა კიდევ უფრო ინტენსიურ ხასიათს მიიღებს.

შეხვედრის დასასრულს, ტაილანდის მეფემ წარმატებული დიპლომატიური მისია უსურვა საქართველოს ელჩს. თავის მხრივ , არჩილ ძულიაშვილმა აღნიშნა, რომ საქართველოს ელჩის რანგში, ძალისხმევას არ დაიშურებს ორი ქვეყნის ურთიერთობების კიდევ უფრო გააქტიურებისთვის.