არქივი
კომენტარი
საქართველოს ტერიტორიიდან ადამიანის გაქრობა ქვეყნის სუვერენიტეტისთვის სერიოზული გამოწვევაა- გიორგი მარგველაშვილი
საქართველოს პრეზიდენტის, გიორგი მარგველაშვილის განცხადებით, საქართველოს ტერიტორიიდან ადამიანის გაქრობა, ქვეყნის სახელმწიფოებრიობისთვის, ქვეყნის სუვერენიტეტისთვის სერიოზული გამოწვევაა.
ამის შესახებ მარგველაშვილმა, აზერბაიჯანელ ჟურნალისტთან დაკავშირებით დასმული კითხვის საპასუხოდ განაცხადა.
„ის განცხადებები, რომელიც გაკეთდა ადვოკატის მიერ, აუცილებლად, ბოლომდე გასააზრებელია და გასაანალიზებელი. იმიტომ რომ საქართველოს ტერიტორიიდან- იქნება ეს ზღვით, ჰაერით, ხმელეთით, საქართველოს დედაქალაქიდან, თუ საზღვრიდან- ადამიანის გაქრობა არის კიდევ ერთხელ, ჩვენი სახელმწიფოებრიობისთვის და ჩვენი სახელმწიფოებრივი სუვერენიტეტისათვის სერიოზული გამოწვევა; გამოწვევა, რომლის კონტექსტშიც, ბუნებრივია, სახელმწიფომ უნდა დაიცვას ერთდროულად თავისი პრესტიჟიც და მოქალაქეების დაცულობა. ეს ორივე ძალიან მნიშვნელოვანია“,-განაცხადა პრეზიდენტმა.
მონიკა დავლიანიძე