საზოგადოება

შეიძლება ერთ პროდუქტზე, ორზე, სამზე ფასები გაიზარდოს, მაგრამ არის აგრეთვე პროდუქტები, რომლებზეც ფასები მცირდება - კობა გვენეტაძე

ფასებზე გავლენას ახდენს, რა თქმა უნდა, კურსის დევალვაცია, მაგრამ ამავე დროს უნდა შევხედოთ, რამდენად ახდენს გავლენას, - განაცხადა საქართველოს ეროვნული ბანკის პრეზიდენტმა, კობა გვენეტაძემ საზოგადოებრივი მაუწყებლის გადაცემა ,,მთავარში’’ ეროვნული ვალუტის გაუფასურების კვალდაკვალ პროდუქტებზე ფასების შესაძლო მომატებაზე საუბრისას.

,,შეიძლება ერთ პროდუქტზე, ორზე, სამზე ფასები გაიზარდოს, მაგრამ იქ არის აგრეთვე პროდუქტები, რომლებზეც ფასები მცირდება. ამ წუთში შემიძლია გითხრათ, რომ ბოლო მონაცემებით, ბოლო 12 თვის განმავლობში, ესე იგი ნოემბრის ბოლოს ფასების ზრდა საქართველოში 0.6 % იყო. ნიშნავს თუ არა ეს, რომ საერთოდ არასდროს გაიზრდება ფასები? არ ნიშნავს, არავითარ შემთხვევაში. იქნება ფაქტორები, რომლებიც იმოქმედებს ფასების ზრდაზე და სხვათა შორის, დაბალი ინფლაციაც არ არის ძალიან კარგი. თუ ჩვენ მინუსების ინფლაციაზე ვილაპარაკებთ, ეს უკვე დეფლაცია იქნება და ეს ასევე არასასურველია ეკონომიკისთვის, რადგანაც მოთხოვნას ამცირებს, ისევე როგორც, მაღალი ინფლაცია.

რომ შევხედოთ ზოგადად, ცუდი გამოცდილება არ გვაქვს ამასთან დაკავშირებით. ეროვნულ ბანკს გააჩნია ბერკეტები ამასთან დაკავშირებით, თუ მოხდება შემჩნევა, რომ არის მოლოდინები ფასების ზრდის, რომ იზრდება ფასები, მიიღოს საკმარისი ზომები ამ პროცესის შესაჩერებლად”,- აცხადებს კობა გვენეტაძე.

ნინო ექვთიმიშვილი