საზოგადოება

შეუძლებელია,პრეზიდენტის მოსაზრებებს არ დაეთანხმო - ანა ნაცვლიშვილი

საქართველოს პრეზიდენტი გიორგი მარგველაშვილი სასამართლო რეფორმის მესამე ტალღასთან დაკავშირებით შეხვედრა გამართა მესამე სექტორის წარმომადგენლებთან.

„საქართველოს ახალგაზრდა იურისტთა ასოციაციის“ თავჯდომარის, ანა ნაცვლიშვილის თქმით, პრეზიდენტის შენიშვნები მიმართულია როგორც სასამართლოს, ასევე ინდივიდუალური მოსამართლეების გაძლიერებისაკენ, რასაც ის ეთანხმება.

"ეს შენიშვნები და მათი ლოგიკა ეყრდნობა ვენეციის კომისიის მოსაზრებას და ამოსავალი პრინციპი , როგორც ჩვენ გავეცანით, არის სასამართლოსა და ინდივიდუალური მოსამართლეების გაძლიერება. ამიტომ, შეუძლებელია, ამ მოსაზრებებს არ დაეთანხმო. ჩვენ ვფიქრობთ, რომ პარლამენტმა არსებითად უნდა განიხილოს ეს მოტივირებული შენიშვნები და მაქსიმალურად შემჭიდროებულ ვადებში, ამ შენიშვნების გათვალისწინებით, კანონად აქციოს სასამართლო ე.წ. მესამე ტალღა“, - განაცხადა ანა ნაცვლიშვილმა.

„ადვოკატთა ასოციაციის“ თავჯდომარემ ზაზა ხატიაშვილმა ჟურნალისტებთან განაცხადა, რომ უმრავლესობის მიერ წარდგენილი ცვლილებები ვერ უზრუნველყოფს სასამართლო სისტემის დამოუკიდებლობას.

„სასამართლოს თავჯდომარეს ნიშნავს იუსტიციის უმაღლესი საბჭო და მერე სასამართლო თავჯდომარე აკომპლექტებს იუსტიციის უმაღლეს საბჭოს. ანუ, ორმაგი ბერკეტია თავჯდომარიდან ზეწოლაზე მოსამართლეზე . ერთია, რომ სასამართლოს თავჯდომარეა, მეორე კიდევ, რომ მისი ბედი მის ხელშია . აი, ეს არის ყველაზე დიდი უბედურება და ინსპექტორი. წულუკიანი გაიძახოდა, რომ ინსპექტორი იქნებოდა დამოუკიდებელი და გამოდის, რომ ვინ ნიშნავს, ვინ ირჩევს ინსპექტორს? იუსტიციის უმაღლესი საბჭო.ანუ, პატარა მურუსიძეს დანიშნავენ დიდი მურუსიძეები“, - განაცხადა ხატიაშვილმა.

არასამთავრობოებთან შეხვედრამდე, პრეზიდენტმა გამართა მოლაპარაკებები საპარლამენტო უმცირესობის წევრებთან. პრეზიდენტთან შეხვედრას ესწრებოდნენ „საქართველოს პატრიოტთა ალიანსის“, „ნაციონალური მოძრაობისა“ და „ევროპული საქართველოს“ წევრები.

მიწვევის მიუხედავად, შეხვედრას არ ესწრებოდნენ საპარლამენტო უმრავლესობის წარმომადგენლები.

შეგახსენებთ, რომ 24 იანვარს საქართველოს პრეზიდენტმა მართლმსაჯულების მესამე ტალღის რეფორმას ვეტო დაადო.

ანა მებურიშვილი