საზოგადოება

შრომის უსაფრთხოებასთან დაკავშირებული კანონპროექტის ახალი ვერსიით, დარღვევებზე სანქციები ორმაგდება

შრომის უსაფრთხოებასთან დაკავშირებული კანონპროექტის ახალი ვერსიით, დარღვევებზე სანქციები ორმაგდება, - განაცხადა ჯანდაცვის მინისტრის მოადგილემ, თამილა ბარკალაიამ, რომელიც პარლამენტში, ჯანდაცვის კომიტეტის წევრებს შრომის უსაფრთხოების საკითხზე კანონპროექტს აცნობს.

როგორც მინისტრის მოადგილემ აღნიშნა, გასულ კვირას უწყებამ ერთი კვირა ითხოვა, რათა კანონპროექტი სრულყოფილი გამხდარიყო და კრიტიკა გაეთვალისწინებინა.

"იყო კრიტიკა განმეორებით მონიტორინგთან დაკავშირებით, ასევე სანქციების რაოდენობაზე. მივიღეთ გადაწყვეტილება და სანქციების რაოდენობა განსხვავებულია. ისინი დაყოფილია დღგ-ს გადამხდელთა რაოდენობით. სანქცირების მექანიზმი მიბმული იქნება დღგ-ს რაოდენობაზე. კრიტიკა იყო ასევე იმასთან დაკავშირებით, რომ სანქციები იყო დაბალი, შემიძლია გითხრათ, რომ წინა ვერსიასთან შედარებით ჯარიმის ოდენობა გაორმაგდა", - განაცხადა მინისტრის მოადგილემ.

ამასთან, მინისტრის მოადგილის განმარტებით, გათვალისწინებულია ინსპექტირების განხორციელება სასამართლოს გარეშე.

"ეს არის გეგმური ინსპექტირების შემთხვევა, ასევე განმეორებითი მონიტორინგი და იქნება შემთხვევები, როცა შეტყობინება არის შემოსული გარკვეული ორგანიზაციიდან - ანუ ამ სამ შემთხვევაში მოხდება ორგანიზაციაში შესვლა ნებართვის გარეშე", - განაცხადა მინისტრის მოადგილემ.

მისივე თქმით, ბიზნესს უჩნდება ვალდებულება, რომ გაწეროს შრომის უსაფრთხოება თავისი ორგანიზაციის ფარგლებში, დანიშნოს პასუხისმგებელი პირი, მენეჯერების სახით.

ნინო ექვთიმიშვილი