საზოგადოება

შსს-მ რუსეთის ვიზებთან დაკავშირებით გამოძიება დაიწყო

შინაგან საქმეთა სამინისტრომ რუსეთის საკონსულოს მიმდებარე ტერიტორიაზე საქართველოს მოქალაქეებისთვის ფულის გამოძალვის შემთხვევებზე თაღლითობის მუხლით გამოძიება დაიწყო. საქმე ეხება „კურიერში“ გასულ რეპორტაჟს, რომლიდანაც ირკვევა, რომ მოკლევადიანი ვიზის მისაღებად მოქალაქემ 350 აშშ დოლარი (დაახლოებით 900 ლარი) უნდა გადაიხადოს ქრთამის სახით.

გამოძიების დაწყების პარალელურად რუსეთის საკონსულოსთან რუსეთის ვიზების მიღების მსურველებს სიცხეში უწევთ დგომა.

„კურიერის“ ინფორმაციით, ზოგი მარტივად შედის საკონსულოში, ხოლო რიგში „დაწინაურება“ ქრთამის სანაცვლოდ ხდება.

ვიზის რიგში ის პირებიც არიან, ვინც ამ საბუთის მიღებას მაისიდან ელოდება.

„მოწვევა მაისში მოგვივიდა, მას შემდეგ რიგს ველოდებით.რეგისტრაცია ინტერნეტით გავიარეთ და რიგის ტალონი ვერ ამოვბეჭდეთ, ამიტომ დანიშნულ დღეს ვერ შევედით, ახლა მოვედით და ისევ რიგს ველოდებით“,-განაცხადა ვიზის მირების ერთ-ერთმა მსურველმა.