საზოგადოება

სკოლა თვალს ვერ დახუჭავს და ბუნებრივია ექნება რეაგირება - 67-ე სკოლის დირექტორი

67-ე სკოლის დირექტორის, მარიამ თაქთაქიშვილის შეფასებით, სკოლასთან დღეს განვითარებული მოვლენები მართული პროცესია.

როგორც დირექტორმა ჟურნალისტებს განუცხადა, სკოლის ქიმიის მასწავლებელთან დაკავშირებით დირექციაში განცხადება შევიდა, რომელიც დისციპლინარულ კომიტეტს შესწავლისთვის გადაეცა.

„აღნიშნულ საკითხთან დაკავშირებით შემოვიდა განცხადება, რომელიც გადაეცა დისციპლინარულ კომიტეტს. დისციპლინარული კომიტეტი თავის დასკვნას დადებს და თუ ფაქტი დადასტურდა, ბუნებრივია სკოლა ამასთან დაკავშირებით თვალს ვერ დახუჭავს და ექნება რეაგირება. დღევანდელი პროცესი, რამდენიმე მოსწავლის გარეთ გამოსვლა, არის აბსოლუტურად მართული პროცესი“,-აღნიშნა 67-ე სკოლის დირექტორმა.

ამჟამად სკოლაში განათლების სამინისტროს შიდა აუდიტის დეპარტამენტი მუშაობს, რომელიც საკუთარ დასკვნას უახლოეს დღეებში გაასაჯაროვებს.

67-ე სკოლის მე-12 კლასის მოსწავლეებმა დღეს პროტესტის ნიშნად გაკვეთილებზე არ შევიდნენ. ამის მიზეზი, მათი თქმით, გახდა ქიმიის მასწავლებელსა და დირექტორს შორის არსებული დაპირისპირება, რომლის შედეგად, დირექტორი გეგმავს ქიმიის მასწავლებელი სამსახურიდან გაათავისუფლოს.

თუმცა, ერთ-ერთი მშობელი აცხადებს, რომ დირექტორსა და ქიმიის მასწავლებელს შორის დაპირისპირება არ არსებობს, არამედ, მასწვალებელი „სცემს ბავშვებს. ბოლო ფაქტი დაახლოებით ათი დღის წინ მოხდა. მერვე კლასის მოსწავლე არის ნაცემი, რომელსაც მკლავზე დალურჯებები აღენიშნება. ის ექიმმაც შეამოწმა და საჩივრის წერილს ექიმის სამედიცინო ბარათიც ახლავს“.

ამავე მშობლის მტკიცებით, ქიმიის მასწავლებელმა აზერბაიჯანელი მოსწავლის მიმართ ეთნიკური ნიშნით დისკრიმინაციული ქმედება ჩაიდინა.

„ამ გოგონას დოდო კეზუამ „თათარი“ უწოდა, ასევე უთხრა „აზერბაიჯანულ ქორწილში არ ვყოფილვარ, უნდა გაგათხოვოო“. მოგვიანებით ამავე პედაგოგმა ამ ბავშვს ძვირადღირებული ჩანთა დაუხია, რასაც მშობლის პროტესტი მოყვა. მშობელი აცხადებდა, რომ თუ რეაგირება არ მოყვებოდა მის საჩივარს, რომელიც სკოლის დირექტორის სახელზე დაიწერა, მაშინ წავიდოდა და აზერბაიჯანის საელჩოში იჩივლებდა“.

მონიკა დავლიანიძე