საზოგადოება

სპეციალისტი ზაფხულის ცხელ დღეებთან დაკავშირებით რეკომენდაციებს იძლევა

დაავადებათა კონტროლის ეროვნული ცენტრის გადამდებ დაავადებათა დეპარტამენტის უფროსი, ხათუნა ზახაშვილი ზაფხულის ცხელ დღეებთან დაკავშირებით რეკომენდაციებს იძლევა.

როგორც ზახაშვილმა დღეს გამართულ პრესკონფერენციაზე განაცხადა, ზაფხულში მაღალ ტემპერატურასთან დაკავშირებით, გარკვეული რისკები არსებობს.

მისივე თქმით, შუადღის საათებში, მაშინ, როცა ჰაერის ტემპერატურა განსაკუთრებით მაღალია, ადამიანებმა ფიზიკური აქტივობებისგან თავი უნდა შეიკავონ და შეეცადონ, გრილ, ჩრდილიან ადგილას გაჩერდნენ.

„მზის ენერგიის არასწორი მოხმარების შემთხვევებმა, შესაძლოა, გამოიწვიოს სითბური დაკვრა, ან მზის დაკვრა, ასევე მზისმიერი დამწვრობა. ამიტომ ნებისმიერ შემთხვევაში უნდა ვიყოთ ძალიან გონიერები, როდესაც ზაფხულში ვცდილობთ ან დასვენების დაგეგმვას, ან ჩვენს ჩვეულებრივ საქმიანობას. ძალიან მაღალ ტემპერატურაზე, შესაძლოა, შრომის ნაყოფიერებაც დაქვეითებული გვქონდეს,“- განაცხადა ზახაშვილმა.

მისი თქმით, ძალიან მნიშვნელოვანია წყლის მიღების რეჟიმის დაცვა, რაც გულისხმობს იმას, რომ ადამიანმა, განსაკუთრებით მაშინ, როცა ტემპერატურა მაღალია, სასმელი წყალი საჭირო რაოდენობით უნდა მიიღოს.

„აქ არის საუბარი სასმელ წყალზე და არა მინერალიზებულ, გაზიან, კოფეინიან, ალკოჰოლიან სასმელებზე, რომლებმაც, შეიძლება, ადამიანის თვითშეგრძნება მაღალ ტემპერატურასთან ერთად, რამდენადმე დაამძიმოს ან არაკომფორტული გახადოს“- განაცხადა ზახაშვილმა.

განსაკუთრებულ ყურადღების გამოჩენას ურჩევს ის მცირეწლოვანი ბავშვების მშობლებს.

„ბავშვები ხშირად ვერ აკონტროლებენ, როგორ და სად უნდა იყვნენ ასეთ პერიოდში.

მაღალი ტემპერატურების პერიოდში და შუადღისას, ერიდეთ ბავშვების გარეთ ფიზიკურ აქტივობას, ეცადეთ, რომ ჩრდილიან ადგილას იყვნენ. გასეირნება რეკომენდებულია დილა- საღამოს. ეცადეთ, ბავშვები შემოსილი გყავდეთ ღია ფერის, თხელი, ფართო ტანსაცმლით, რათა მოარიდოთ მწერებისგან დაკბენას. დიდ ქალაქებში არსებობს გარკვეული რისკი ლეიშმანიოზით პატარა ბავშვების ინფიცირებისა. სახლის კარი, ფანჯრები, ვეცადოთ, რომ იყოს ბადით დაფარული, რაც შეაკავებს კოღოებს, ბუზებსა და სხვა მწერებს“, – განაცხადა ზახაშვილმა.