საზოგადოება

სვანეთში მამის მიერ 8 შვილის შინაპატიმრობაში გამოკეტვის ფაქტზე შსს-მ გამოძიება დაიწყო

შსს-მ სვანეთში მამის მიერ 8 შვილის შინაპატიმრობაში გამოკეტვის ფაქტზე, გამოძიება იძულების მუხლით დაიწყო.

როგორც შს მინისტრის მოადგილე ნათია მეზვრიშვილმა დღეს გამართულ პრესკონფერენციაზე განაცხადა, მიმდინარეობს შესაბამისი საგამოძიებო მოქმედებები, რათა დადგინდეს, არიან თუ არა არასრულწლოვნები შინაპატიმრობაში.

"სვანეთში მიმდინარე მოვლენები საკმაოდ კომპლექსური და სენსიტიური საკითხია. ჩვენ ის, რაც შსს-ზე იყო დამოკიდებული, უკვე გავაკეთეთ - დავიწყეთ გამოძიება იძულების მუხლით, მაგრამ მხოლოდ გამოძიების დაწყება ამ საქმეზე და კონკრეტული პირების სისხლის სამართლებრივი პასუხისმგებლობის საკითხის დაყენება, ვერ იქნება ამ საკითხის გადაჭრის სწორი გამოსავალი, ვინაიდან საკითხი კომპლექსურია, სენსიტიურია, არასრულწლოვნები არიან ჩართულები ამ პროცესებში და მიგვაჩნია, რომ სოციალური სამსახურების როლი ამ პროცესებში ძალიან მნიშვნელოვანია. მიმდინარეობს შესაბამისი საგამოძიებო მოქმედებები და ახალი დეპარტამენტის ფარგლებში. მზად ვართ, ყველა მხარეს მოვუსმინოთ, ვინც დაინტერესებულია ამ საქმით და ერთად მივიღოთ კანონიერი გადაწყვეტილება", - განაცხადა ნათია მეზვრიშვილმა.

ცნობისათვის, ტელეკომპანია "რუსთავი 2"-ის ინფორმაციით, სვანეთში ამირან დევნოზაშვილს 8 შვილი უკვე წლებია, სახლში ჰყავს გამოკეტილი.

მას სამი ვაჟი და 5 ქალიშვილი ჰყავს. მათგან ყველაზე უფროსი - გოგონა 21 წლისაა, უმცროსი ბიჭი კი - 7-ის. მამა მათ სკოლაში სწავლას და თანატოლებთან კონტაქტსაც კი უკრძალავს. ამირან დევნოზაშვილი ამბობს, რომ მისი შვილები საზოგადოებისგან მხოლოდ ცუდს ისწავლიან.