პოლიტიკა
თამარ ბაგრატიამ გარემოს ეროვნული სააგენტოს ხელმძღვანელის თანამდებობა დატოვა
გარემოს ეროვნული სააგენტოს ხელმძღვანელმა, თამარ ბაგრატიამ თანამდებობა დატოვა.
კერძოდ, როგორც ბაგრატია აცხადებს, გარემოს დაცვისა და სოფლის მეურნეობის მინისტრის მოადგილე მას სააგენტოში არაკვალიფიციური კადრის დასაქმებას ავალებდა, რაც მისთვის მიუღებელია.
,,მიზეზი გახდა სააგენტოში რეორგანიზაციის პროცესში გარკვეულ საპასუხისმგებლო თანამდებობაზე გარკვეული პირის დანიშვნის მოთხოვნა. მე ვერ დავეთანხმებოდი ასეთი ტიპის დირექტივას და ამ პიროვნების ამ თანამდებობაზე დანიშვნას.
ეს იყო წინადადება მინისტრის მოადგილის მხრიდან, ჩემთვის სრულიად მოულოდნელად. უნდა დამენიშნა რამდენიმე საათში, ისე რომ საკითხი არც მქონოდა განხილული. შესაბამისად, მე მივიღე გადაწყვეტილება, რომ ასეთ რეჟიმში და ასეთ პირობებში შეუძლებელი იყო ჩემი საქმიანობის გაგრძელება. ეს არ არის ჯანსაღი სიტუაციის მაჩვენებელი“, - აცხადებს თამარ ბაგრატია ტელეკომპანია ,,იბერიასთან“ საუბარში.
გარემოს ეროვნული სააგენტოს უკვე ყოფილი ხელმძღვანელის ბრალდებებს პასუხობს მინისტრის მოადგილე ნინო თანდილაშვილი და ამბობს, რომ მისთვის გაუგებარია ბაგრატიას განცხადება.
,,არ ვიცი, რა კონკრეტულ ბრალდებებზე საუბრობს ქალბატონი თამარი. საჯარო სამსახურში თანამდებობებზე დანიშვნები შესაბამისი კანონმდებლობის საფუძველზე ხდება. ასე რომ, არავინ არავის არ სთხოვს არავის დანიშვნას. ეს არის კანონმდებლობით დადგენილი წესის შესაბამისად. შესაბამისი კვალიფიკაციის ადამიანები ინიშნებიან საჯარო სამსახურში. ასე რომ, დანიშვნის თხოვნა, არასწორი ინტერპრეტაციაა“, - აცხადებს თანდილაშვილი.
ნინო ექვთიმიშვილი