საზოგადოება

თბილისის მერია სტუდენტისთვის სარეზერვო ფონდიდან თანხის გამოყოფასთან დაკავშირებით განმარტებას აკეთებს

თბილისის მერია „მორიგ სიცრუეს“ უწოდებს „ნაციონალური მოძრაობის“ ინფორმაციას იმის შესახებ, რომ თითქოსდა, დედაქალაქის მერმა სარეზერვო ფონდიდან თანხა გადაურიცხა სტუდენტს, რომელიც სოციალურად დაუცველთა ერთიან ბაზაში რეგისტრირებული არ ყოფილა.

როგორც მერიის განცხადებაშია ნათქვამი, გავრცელებული ინფორმაცია თბილისის მერიის საქმიანობის მიზანმიმართულ დისკრედიტაციას ემსახურება.

თბილისის მერია დოკუმენტაციას ასაჯაროვებს იმის დასადასტურებლად, რომ აღნიშნული სტუდენტი დაფინანსების გამოყოფას საჭიროებდა მისი ოჯახის მძიმე სოციალურ-ეკონომიკურ მდგომარეობიდან გამომდინარე.

,,ამასთან, განვმარტავთ, რომ 2015 წლის 25 დეკემბერს თბილისის მერიის განათლების, სპორტის და ახალგაზრდულ საქმეთა სამსახურს მიმართა მოქალაქე დეა გოლიაძემ სწავლის დაფინანსების მოთხოვნის თაობაზე. წერილში ნათქვამი იყო, რომ ოჯახი იმყოფებოდა მძიმე სოციალურ-ეკონომიკურ პირობებში, რასაც თავადვე ადასტურებდა ფაქტებით.

გარდა ამისა, განცხადებას თან ერთვოდა ცნობა თბილისის სახელმწიფო სამედიცინო უნივერსიტეტიდან, 6000 ლარის დავალიანების თაობაზე.

გამომდინარე იქიდან, რომ სტუდენტი სოციალურად დაუცველი არ იყო და მისთვის თანხის გამოყოფა სცდებოდა განათლების, სპორტის და ახალგაზრდულ საქმეთა სამსახურის კომპეტენციასა და უფლებამოსილებას, სამსახურმა გაგზავნა შუამდგომლობის წერილი თბილისის მერთან - სარეზერვო ფონდიდან თანხის გამოყოფის თხოვნის თაობაზე.

წერილში ნათლად ჩანს, რომ თანხის გამოყოფა უნდა განხორციელებულიყო არა როგორც სოციალურად დაუცველი სტუდენტისთვის, არამედ, როგორც მძიმე სოციალურ-ეკონომიკურ მდგომარეობაში მყოფი ოჯახისათვის.

ზემოაღნიშნულიდან გამომდინარე, გვსურს კიდევ ერთხელ მოვუწოდოთ „ნაციონალურ მოძრაობას“, მერიის საქმიანობის მიზანმიმართული დისკრედიტაციის მიზნით, ნუ გაავრცელებენ ცრუ ინფორმაციას და ნუ შეიყვანენ შეცდომაში საზოგადოებას. ამასთან, მიგვაჩნია, რომ მსგავსი ტრაგიკული ისტორიებით მანიპულირება პოლიტიკური ქულების დაწერის მიზნით, სცდება ყოველგვარ ზნეობრივ ნორმას’’, - ნათქვამია მერიის განცხადებაში.