უახლესი ამბები
არქივი
პოლიტიკა
თბილისისა და ნატო-ს თანამშრომლობის გაღრმავება რეგიონის უსაფრთხოებას ემუქრება - რუსეთის საგარეო უწყება
რუსეთის საგარეო საქმეთა სამინისტრო 10-11 ოქტომბერს ჟენევაში გამართული, ამიერკავკასიაში უსაფრთხოებისა და სტაბილურობის შესახებ კონსულტაციების მორიგი რაუნდის შესახებ ინფორმაციას ავრცელებს.
როგორც რუსეთის საგარეო საქმეთა სამინისტროს მიერ გავრცელებულ ინფორმაციაში ნათქვამი, „რუსეთის, აფხაზეთისა და სამხრეთ ოსეთის დელეგაციებმა ყურადღება გაამახვილეს ნატო-სა და თბილისის თანამშრომლობის გაღრმავებაზე, რაც რეგიონალური უსაფრთხოების რეალურ საშიშროებად აღიქმება.
„ჩრდილოატლანტიკური ალიანსის სწავლებაში, რომელიც მიმდინარე წლის ზაფხულსა და შემოდგომაზე საქართველოში ჩატარდა, რეკორდული რაოდენობის სამხედრომოსამსახურე და სამხედრო ტექნიკა იყო ჩართული. ნატო-ს წევრი ქვეყნების ემისარები, რომლებიც ამ სწავლებაში მონაწილეობდნენ, ხაზს უსვამდნენ მანევრების ანტირუსულ მიმართულებაზე და სწავლებების მნიშვნელობაზე სამხრეთ ოსეთის სამომავლო „დეოკუპაციაზე“. თბილისისა და ალიანსის წევრების ამგვარი ქმედება ეწინააღმდეგება ჟენევის დისკუსიების მიზნებს, აუფასურებს ფორმატის მუშაობას და რეგიონში დაძაბულობის ზრდას უწყობს ხელს. გარდა ამისა, ბუქარესტში გამართულ ნატო-ს საპარლამენტო ასამბლეაზე მიღებული რეზოლუცია პროვოკაციულ და მიუღებელ ხასიათს ატარებს“,-ნათქვამია რუსეთის საგარეო უწყების განცხადებაში.
საგარეო უწყებაში აღნიშნავენ, რომ რუსეთმა, აფხაზეთმა და სამხრეთ ოსეთმა კიდევ ერთხელ მოითხოვეს ძალის გამოუყენებლობის შესახებ იურიდიული დოკუმენტის გაფორმება.
რუსული მხარე ასევე აცხადებს, რომ ჟენევის დისკუსიის ყველა მონაწილემ აღნიშნა, რომ საოკუპაციო ხაზთან სიტუაცია სტაბილური და პროგნოზირებადია.
„გამშვები პუნქტები ფუნქციონირებს, ხოლო ინციდენტების რაოდენობა საშუალო სტატისტიკურ მონაცემებსც არ ცდება. ავტობუსების გადაადგილებამ შეამსუბუქა გალის რაიონში ტრანსპორტის ხელმისაწვდომობა“,- ნათქვამია განცხადებაში.
ამასთან, რუსეთის საგარეო უწყებაში აცხადებენ, რომ ჟენევაში გამართულ დისკუსიებზე ოკუპირებული აფხაზეთის წარმომადგენლებმა საქართველოსა და მისი მოკავშირეების მხრიდან „აფხაზეთის ხელოვნურ იზოლაციაზე“ ისაუბრეს, რაც მათი თქმით, ე.წ. აფხაზური პასპორტების „არაღიარების გზით ხორციელდება“.
განცხადების მიხედვით, ცხინვალის წარმომადგენლებმა კი ყურადღება საოკუპაციო ზოლთან უცხოელი პოლიტიკოსების ხშირ სტუმრობაზე გაამახვილეს, რაც მათი მტკიცებით, „ვითარებას ძაბავს“.
მოლაპარაკებების მორიგი რაუნდი გაიმართება 12-13 დეკემბერს.
მონიკა დავლიანიძე