სამართალი

თეა წულუკიანის შეურაცხყოფის საბაბით დაწყებულ საქმეზე შსს აქტივისტ ალბი კორძაიას მიმართ პატიმრობის გამოყენებას ითხოვს

თეა წულუკიანის შეურაცხყოფის საბაბით დაწყებულ საქმეზე შსს აქტივისტ ალბი კორძაიას მიმართ პატიმრობის გამოყენებას ითხოვს.

ალბი კორძაიას შსს თეა წულუკიანის შეურაცხყოფას ედავება.

მას შემდეგ, რაც 11 აპრილს თეა წულუკიანმა საქართველოს ეროვნულ გმირზე, გიორგი ანწუხელიძეზე საუბრისას თქვა ფრაზა „უაზროდ განწირული ვიღაცის პიარისთვის“, აქტივისტები მის სახლთან მივიდნენ და წულუკიანის განცხადება გააპროტესტეს.

სწორედ ამ შემთხვევასთან დაკავშირებით ედავება შსს აქტივისტს შესაძლო სამართალდარღვევას.

უწყების პოზიციით, ალბი კორძაიამ თეა წულუკიანს ხმის გამაძლიერებლით უწოდა „რუსეთის მონა“ და „ქვეყნის მოღალატე“.

პროცესზე დაიკითხა ოქმის შემდეგენლი პოლიციელი გიორგი გოგოლაძე, რომელმაც თქვა, რომ ვიდეო სოციალურ ქსელში ნახა და სპეციალური ელექტრონული პროგრამის მეშვეობით მოახდინა ალბი კორძაიას იდენტიფიცირება.

მოსამართლე მანუჩარ ცაცუამ მოწმეს ჰკითხა, რა იცის თეა წულუკიანის ოჯახურ მდგომარეობაზე, რაზეც პოლიციელმა თქვა, რომ წულუკიანი დაქორწინებულია და არასრულწლოვანი შვილი ჰყავს.

მისივე ინფორმაციით, ოჯახი ამ დროს სახლში იმყოფებოდა. ადვოკატის შეკითხვაზე, საიდან ფლობს მოწმე ამ ინფორმაციას, გოგოლაძემ განაცხადა, რომ წულუკიანის არასრულწლოვანი შვილის შესახებ ინფორმაცია დეკლარაციიდან მიიღო.

„საღამოს საათებში, რომელიც არ იყო ღამე, მივედი წულუკიანთან და ვთქვი, რაც იყო სათქმელი

მე წულუკიანთან არ მივიდოდი, რომ არ ყოფილიყო პრეისტორია, რომ არ ეთქვა, რომ ანწუხელიძე არის პიარს შეწირული ადამიანი“, - თქვა სხდომაზე ალბი კორძაიამ.

ალბი კორძაია წულუკიანის სახლთან ორჯერ იყო მისული. პირველად 11 აპრილის ღამეს და მისი თქმით, ამ დროს აქციაზე ხმის გამაძლიერებლით არ უსარგებლია. მეორედ ის წულუკიანის სახლთან 12 აპრილს მივიდა. სხდომაზე კორძაიამ აღნიშნა, რომ ოქმში შსს-მ ამ ორი საღამოს გარემოებები აურია.

სხდომაზე განიხილეს ვიდეომტკიცებულებებიც, რომელშიც ისმის ფრაზები: „ანწუხელიძე გმირია, თეა მოღალატეა; თეა წულუკიანი არის რუსი, ანწუხელიძე გმირია, ის პიარს არ შეეწირა, სამშობლოს შეეწირა; წულუკიანო, შენ რუსო, ქვეყნის მოღალატე“.

წყარო