საზოგადოება

ტერორისტებთან კავშირში ბრალდებული პირები საქართველოში სამი წელი იყვნენ - თემირლან მაჩალიკაშვილის მამა

პანკისის ხეობაში ჩატარებული სპეცოპერაციის შედეგად დაღუპული თემირლან მაჩალიკაშვილის მამის, მალხაზ მაჩალიკაშვილის ინფორმაციით, მისი შვილი ისნის 21-22 ნომებრის სპეცოპერაციის შედეგად დაკავებულ და ლიკვიდირებულ პირებთან მეგობრობდა და ისინი მათ სახლში მოდიოდნენ სტუმრის სტატუსით.

უფროსი მაჩალიკაშვილის თქმით, ტერორიზმში ბრალდებული პირები საქართველოში ბოლო 3 წლის განმავლობაში ცხოვრობდნენ. მან არ გამორიცხა, რომ მათ ჰყოლოდათ კავშირები სუს-ში.

„თემირლანს არაფერი უთქვამს მათზე, ჩემთან ჩაიზეც იმყოფებოდა, ეს ჩვენი წესია. ჩვენ რამდენადაც ვიცოდით, წასულები იყვნენ. აქ ისინი სამი წელი იყვნენ. ისმება კითხვა, როცა ამდენი ხანი აქ იმყოფებოდნენ, ისინი მეგობრებს აქ შეიძენდნენ და იქნებ, უშიშროებასა და უსაფრთხობაშიც ჰყავდათ მეგობრები? ძალიან ცუდი რეჟისორის შექმნილი ფილმის ცუდი სცენარია“, - თქვა მალხაზ მაჩალიკაშვილის მამამ ტვ პირველის გადაცემა „დღის ამბებში“.

მალხაზ მაჩალიკაშვილის თქმით, თემირლანისთვის უცნობი იყო ისნის სპეცოპერაციის შედეგად დაკავებულ და ლიკვიდირებულ პირთა კავშირი ტერორისტებთან.

თემირლან მაჩალიკაშვილი 26 დეკემბერს, პანკისის ხეობაში ჩატარებული სპეცოპერაციის დროს დაჭრეს. ახალგაზრდა მამაკაცი 10 იანვარს თბილისში, საავადმყოფოში გარდაიცვალა.

პანკისსა და თბილისში ჩატარებული სპეცოპერაციის დროს სუსმა 5 პირი დააკავა. თბილისის საქალაქო სასამართლომ მათ პატიმრობა შეუფარდა.

ბრალდების მიხედვით, დაკავებულები, სავარაუდოდ, აჰმედ ჩატაევის მოკავშირეები იყვნენ, ისინი დაეხმარნენ ჩატაევს საქართველოს საზღვარზე გადმოსვლასა და თბილისში ბინის ქირაობაში, სადაც 21-22 ნოემბერს სპეცოპერაცია ჩატარდა.

სუსის ცნობით, დაკავებული პირები 21-22 ნოემბრის სპეცოპერაციის დროს მოკლულ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმები საქართველოში მომუშავე დიპლომატიურ კორპუსებზე.