კომენტარი

„ტოტალური აგრესიის მსხვერპლი ვართ“ - შალვა ნათელაშვილი დავით გარეჯში ჩავიდა

"ლეიბორისტული პარტიის“ ლიდერი შალვა ნათელაშვილი დავით გარეჯში ჩავიდა და საქართველოს ხელისუფლებას, აზერბაიჯანელი მესაზღვრეების მიერ უდაბნოს მონასტრისკენ გზის ჩაკეტვის ფაქტზე, დროულ რეაგირებისკენ მოუწდა.

„თუ ეს ხელისუფლება დღესვე არ მოითხოვს გაეროს უშიშროების საბჭოს საგანგებო სხდომის მოწვევას, აზერბაიჯანის მიერ განხორციელებული აგრესიის და ოკუპაციის ფაქტზე, რომელიც არაფრით არ განსხვავდება რუსული აგრესიისგან, რუსი ჯარისკაცებიც ასე ღობავენ ატოცს, ნიქოზს, ოძისს, ენგურს, ესენიც ასე ღობავენ, ანუ პრაქტიკულად, ტოტალური აგრესიის მსხვერპლი ვართ. ეს უნდა განიხილოს გაეროს უშიშროების საბჭომ და დაადოს სანქციები პრეზიდენტ ალიევის ხელისუფლებას.

როცა სჭირდებათ, ივანიშვილს და ალიევს, ძალიან კარგად შეუძლია მოლაპარაკება მათ შორის, იმ საკითხებზე, რაც შეეხება მათ მილიარდიან ბიზნესს. მაგრამ როცა არ სჭირდება ივანიშვილს, მაშინ საქართველო ეშმაკსაც წაუღია,“ - განაცხადა შალვა ნათელაშვილმა.

დავით გარეჯის უდაბნოს მონასტრამდე მისასვლელი გზა 4-დღიანი ჩაკეტვის შემდეგ, დღეს მხოლოდ 15 მაისამდე გაიხსნა. „კურიერთან“ საუბრისას აზერბაიჯანელ მესაზღვრეები ამბობენ, რომ კლდეში ნაკვეთ სამონასტრო კომპლექსამდე ხალხს მხოლოდ აღდგომის დღესასწაულზე შეუშვებენ, 15 მაისიდან კი შესაძლებელია გზა ისევ ჩაკეტონ.