სამართალი
ციანიდი არ შემიძენია და არც ბარგში მქონია, ჩადეს! ისიც ვიცი, ვინ ჩადო - დეკანოზი გიორგი მამალაძე
მეუფე იაკობი მართლაც თავიდან ბოლომდეა ჩახედული ამ საქმეში და მან კარგად იცის, რომ არავის მკვლელობა არ იგეგმებოდა. ეს ცილისწამებაა და მისი როლი ამ საქმეში მის სინდისზე იყოს. მიღმულ სამყაროში ხარისხი და წოდება არ არსებობს, არც ის იქნება ეპისკოპოსი და არც მე - დეკანოზი. უფალი განგვსჯის, - ასე ეხმაურება ტელეკომპანია "რუსთავი 2"-ისთვის გაგზავნილ წერილში დეკანოზი გიორგი მამალაძე პატრიარქის ქორეპისკოპოს, მეუფე იაკობს, რომელმაც ქადაგებაში თქვა, რომ დეკანოზის საქმეს კარგად იცნობს და ნამდვილად პატრიარქის მკვლელობა იგეგმებოდა.
კითხვაზე, თუ რატომ შეიცვალა პროკურატურის ვერსია, როდესაც მან მკვლელობის მომზადება ჯერ პატრიარქს, შემდეგ კი შორენა თეთრუაშვილს დაუკავშირა, დეკანოზი პასუხობს: "ცოტა დაიბნენ, აღარ იცოდნენ, რომელი ვერსია იყო მათთვის ხელსაყრელი. თან მტკიცებულებებიც ძალიან მყიფე ჰქონდათ და გადაწყვიტეს, ბუნდოვნად დაეტოვებინათ, თუ ვისი მკვლელობა იგეგმებოდა".
კითხვაზე, რეალურად, რაზე ელაპარაკებოდა ის ირაკლი მამალაძეს, დეკანოზი პასუხობს: "პროკურატურამ, სამწუხაროდ, არ გამოაქვეყნა საუბრის ის ნაწილი, სადაც ჩანს, რომ არავის მკვლელობა არ იგეგმებოდა და ეს უხამსი სიტყვები მხოლოდ ფიგურალური გამოთქმები იყო. როგორც კი გაუთქმელობის შეზღუდვა მოიხსნება, ეს ვიდეოჩანაწერი სრულად გამოქვეყნდება და ნათელი მოეფინება ყოველივეს".
მისივე თქმით, პროკურატურამ კარგად იცის, თუ რისთვის სჭირდებოდა დეკანოზს ციანიდი.
"პროკურატურამ კარგად იცის, ვინ მთხოვა ამ ნივთიერების შეძენა და რისთვის. სწორედ გამიგეთ, ამ საკითხის დეტალებზე სასამართლოზე უნდა ვისაუბრო და ამ ეტაპზე თავს შევიკავებ პასუხის გაცემისგან. უბრალოდ გეტყვით, რომ ეს იყო ბევრი მხარის მიერ დაგებული მახე’’, - აცხადებს დეკანოზი.
ბრალდებული ასევე ამბობს, რომ მას ციანიდი არც შეუძენია და არც ბარგში ჰქონია. ის ამტკიცებს, რომ მას შხამიანი ნივთიერება ჩაუდეს.
"ისიც ვიცი, ვინც ჩადო. საათები მოანდომეს ამ სიყალბეს. ეს პროკურატურას არ გაუკეთებია", - აცხადებს დეკანოზი გიორგი მამალაძე.
სახელმწიფო ბრალდების მტკიცებულებებში დევს ერთ-ერთი მოწმის ჩვენება, რომელიც აცხადებდა, რომ 2016 წლის აგვისტოში თქვენ ციანიდის მოძიებას მასაც სთხოვდით. ამ მოწმის მიმოწერისა და სატელეფონო საუბრების ექსპერტიზით კი დადგინდა, რომ თქვენ ამ პიროვნებას არა ციანიდის, არამედ გველის შხამის შეძენაში დახმარებას სთხოვდით. რისთვის გჭირდებოდათ გველის შხამი?
კითხვაზე, რისთვის სჭირდებოდა გველის შხამი, რომლის შეძენასაც პროკურატურის მიერ დადგენილ ერთ-ერთ პირს სთხოვდა, დეკანოზი პასუხობს:
"აქაც აიბნა პროკურატურა. სცადეს მოწმის გამოყენება იმისთვის, რომ გაემყარებინათ ჩემ წინააღმდეგ მტკიცებულებები ციანიდთან დაკავშირებით, მაგრამ ტელეფონის ექსპერტიზამ არ დაადასტურა. ამ ფაქტის დეტალებზეც სასამართლოზე უნდა ვისაუბრო".
დეკანოზის თქმით, მას პატრიარქობის ამბიცია არასდროს ჰქონია.
"დეკანოზის ჯვარიც კი მძიმე სატარებელი აღმოჩნდა ჩემთვის", - ამბობს ე.წ. ციანიდის საქმეზე ბრალდებული.
ნინო ექვთიმიშვილი