საზოგადოება

ცინცაძის ქუჩაზე მერიამ მშენებლობის უკანონო ნებართვა გასცა, რამაც ბიუჯეტი 402 ათასი ლარით აზარალა - ალეკო ელისაშვილი

თბილისის საკრებულოს დამოუკიდებელი დეპუტატის, ალექსანდრე ელისაშვილის განცხადებით, დედაქალაქის მერიის შიდა აუდიტის მიერ მომზადებული დოკუმენტის თანახმად, არქიტექტურის სამსახურმა, როდესაც მისი ხელმძღვანელი დიმიტრი მოსულიშვილი იყო, საბურთალოზე, სულხან ცინცაძის 63 ნომერში დაგეგმილ მშენებლობაზე უკანონო ნებართვა გასცა.

როგორც ელისაშვილმა სპეციალურ ბრიფინგზე აღნიშნა, დასკვნის თანახმად, 01.10.15 წელს გაცემულ ნებართვაში, დარღვეული იყო კოეფიციენტების მაჩვენებელი.

გარდა ამისა, თავის დროზე, მერიამ განაცხადა, რომ შენობა 10-სართულიანი იყო, აქედან 4 სართული იყო მიწის ქვეშ,რეალურად კი ჩვეულებრივი ფართი იყო, რის შედეგადაც დასკვნის თანახმად, თბილისის ბიუჯეტმა ნახევარმილიონამდე ზარალი განიცადა.

„სიტყვა სიტყვით არის დადასტურებული, რომ არქიტექტურის სამსახური არის, იყო და რჩება კორუფციის ჭაობი. არქიტექტურის სამსახურთან არსებული ზონალური საბჭო არის ჩაწყობის და ბანდიტიზმის ბუდე. პირდაპირ პროექტის ავტორები საკუთარ განაშენიანობის გეგმებს ამტკიცებენ და კბილებით გააქვთ და აქ (დასკვნა - რედ.) მითითებულია კიდეც ვინ, როგორ და რანაიარად. აქ წერია, რომ 402 ათასი ლარის ზარალი მიადგა თბილისის ბიუჯეტს, შეგნებულად. წერია, რომ არასწორად მოხდა კოეფიციენტების დათვლა, რომ შეგნებულად 10-სართულიანი კორპუსი გაასაღეს 6- სართულიან შენობად და ვითომ 4 სართული იყო მიწისქვეშა სადგომი და სინამდვილეში ეს იყო ჩვეულებრივი ფართი“, -აღნიშნა საკრებულოს დამოუკიდელმა დეპუტატმა.

შეგახსენებთ, რომ სულხან ცინცაძის 63 ნომერში 10-სართუალინი შენობის აშენებას ადგილობრივებიც აპროტესტებენ. მათ სასამართლოში მერიის არქიტექტურის სამსახურის წინააღმდეგ სარჩელიც აქვთ შეტანილი.

მონიკა დავლიანიძე