კონფლიქტის ზონა
ცხინვალის საოკუპაციო ძალების მიერ საქართველოს მორიგი მოქალაქის გატაცების გამო ქართველი აქტივისტები რუსულნომრიან მანქანებს არ გაატარებენ
„რუსმა ოკუპანტებმა გაიტაცეს სოფელი ფლავისმანიდან საქართველოს მოქალაქე, 48 წლის თამაზ ილურიძე“, - ინფორმაცია საქართველოს მოქალაქის მორიგი გატაცების შესახებ სამოქალაქო აქტივისტმა დავით ქაცარავამ გაავრცელა ფეისბუკზე ჩართვისას.
ქაცარავას თქმით, ილურიძის დაკავების გასაპროტესტებლად საქართველოს მოქალაქეები თბილისი-ლარსის გზის მონაკვეთზე არ გაატარებენ რუსული და ოსური ნომრებით მოძრავ მანქანებს.
„ჩვენ გამოვაცხადეთ მოქალაქეების მობილიზაცია. ვგულისხმობ, რომ უკვე იკრიბებიან ჩვენი მოქალაქეები, რომლებიც ემზადებიან რუსი ოკუპანტებისთვის სატვირთო და სამოქალაქო მანქანების მოძრაობის შესაზღუდად. ეს მოხდება თბილისი-ლარსის გზის მონაკვეთზე. ჩვენ ბევრ დროს არ მივცემთ რუს ოკუპანტებს, რომ ეს ადამიანი დაგვიიბრუნონ, ვგულისხმობ თამაზ ილიურიძეს, დააბრუნონ ტყვეობიდან. ჩვენი მხრივ, ბლოკირებას გავუკეთებთ საოკუპაციო რეჟიმის, რუსული და ოსური ნომრებით მოძრავ მანქანებს. სხვა დანარჩენი მანქანები იმოძრავებენ“, - თქვა ქაცარავამ.
თამაზ ილურიძე, რომელიც სოფელ ფლავისმანში საქონელს მწყემსავდა, ცხინვალის რეგიონის მიმართულებით გაიტაცეს.
სუს-ის ინფორმაციით, ოკუპირებული ცხინვალის რეგიონის წარმომადგენლებმა ფლავისმანის მცხოვრები ე.წ. საზღვრის უკანონოდ გადაკვეთის ბრალდებით დააკავეს. შემთხვევის შესახებ ინფორმირებულია ევროკავშირის სადამკვირვებლო მისია.