საზოგადოება

თსუ-მ და კონკურენციის სააგენტომ ერთობლივი მემორანდუმი გააფორმეს

ივანე ჯავახიშვილის სახელობის თბილისის სახელმწიფო უნივერსიტეტის საიუბილეო ღონისძიებების ფარგლებში უნივერსიტეტმა და კონკურენციის სააგენტომ თანამშრომლობის მემორანდუმი გააფორმეს. დოკუმენტს თსუ-ის რექტორმა გიორგი შარვაშიძემ და კონკურენციის სააგენტოს ხელმძღვანელმა ნოდარ ხადურმა მოაწერეს ხელი.

გიორგი შარვაშიძის თქმით, თანამშრომლობის ფარგლებში დაგეგმილია სტაჟირების პროგრამა, რომლის მიზანია სტუდენტების დასაქმების ხელშეწყობა და პრაქტიკული უნარ-ჩვევების განვითარება.

„ძალიან ბევრი მიმართულებით მოხდება ჩვენი თანამშრომლობა. ეს არის პირველი მემორანდუმი, რომელიც დაიდო სახელმწიფო უწყებასთან და, ვვარაუდობთ, რომ ბევრი სხვა უწყება ჩაერთვება ანალოგიურ საქმიანობაში. ჩვენთვის საინტერესო და მისასალმებელია სტაჟირების პროგრამა, ეს ხელს შუწყობს სტუდენტების დასაქმებასა და პრაქტიკული უნარ-ჩვევების ჩამოყალიბებას. ეს პროგრამა იქნება ურთიერთმომგებიანი ყველა მხარისთვის“,- განაცხადა თსუ-ის რექტორმა.

კონკურენციის სააგენტოს ხელმძღვანელმა ნოდარ ხადურმა განაცხადა, რომ მემორანდუმი ორივე მხარის განვითარებაზეა ორიენტირებული.

„ეს არის ორმხრივად სასარგებლო შეთანხმება, ვინაიდან ითვალისწინებს როგორც თბილისის სახელმწიფო უნივერსიტეტის შესაძლებლობების გამოყენებას კონკურენციის განვითარების მიმართულებით ქვეყანაში, ასევე ითვალისწინებს კონკურენციის სააგენტოს შესაძლებლობების გამოყენებას უნივერსიტეტის პროფესორების კვლევის გაუმჯობესებაში, სტუდენტების სტაჟირებისა და მათი პროფესიული ზრდის მიმართულებით”, - აღნიშნა ხადურმა.

სტუდენტთა დასაქმების ხელშეწყობისა და კვალიფიციური კადრების მომზადების გარდა, მემორანდუმი ითვალისწინებს ერთობლივი ღონისძიებების, სამეცნიერო და შემეცნებითი პროექტების, სემინარების, კონფერენციებისა და ტრეინინგების ჩატარებას.

მემორანდუმის თანახმად, უნივერსიტეტის წარმატებული სტუდენტები პრაქტიკულ სწავლებას კონკურენციის სააგენტოში გაივლიან.

ანა მებურიშვილი