პოლიტიკა
თუ კორუფციაში გახვეული პირების პასუხისმგებლობის საკითხს არ აყენებს პირველი პირი, ჩნდება რწმენა, რომ ის თავადაც თანამონაწილეა - თინათინ ხიდაშელი „ომეგას“ საქმეზე
თავდაცვის ყოფილი მინისტრის, თინათინ ხიდაშელის განცხადებით, თუკი ბიძინა ივანიშვილი ქვეყანაში გახმაურებულ კორუფციულ სკანდალებზე არ დააყენებს ოთარ ფარცხალაძისა და სხვა ფიგურანტების პასუხისმგებლობის საკითხს, საზოგადოებას ექნება ლეგიტიმური უფლება, ჩათვალოს ის სამართალდარღვევის თანამონაწილედ.
„ შევარდნაძეს რომ გაეწირა თავის დროზე, სამართლებრივი პასუხისმგებლობა რომ დაეყენებინა კახა თარგამაძისა და იმ ადამიანების, რომლებიც კორუფციის სათავეში იდგნენ, ისე არ დაამთავრებდა ის ხელისუფლებას, სამწუხაროდ, ქვეყანაც იმ მდგომარეობაში არ იქნებოდა, რაშიც შემდეგ აღმოჩნდა. სააკაშვილს კეზერაშვილი და მსგავსი პირების პასუხიმგებლობის საკითხი რომ დაეყენებინა, სხვაგვარად დამთავრდებოდა მათთვისაც და ქვეყნისთვისაც 2012 . და ზუსტად იგივე შეგვიძლია ვთქვათ დღეს.
ბიძინა ივანიშვილს აქვს ძალიან მარტივი გამოსავალი. ბუნებრივია, როგორც ყველა წინა ხელისუფალს, მან უნდა მოითხოვოს ნამდვილი სამართლიანი გამოძიება და ნამდვილი პასუხი ამ კითხვებზე. თუ ეს არ მოხდა, საზოგადოებას აქვს აბსოლუტურად ყველა ლეგიტიმური უფლება, დაიჯეროს, რომ ამ ყველაფრის უკან, თავში, სათავეში თუ ბოლოში, სწორედ ბატონი ივანიშვილია, იმიტომ რომ სხვა შემთხვევაში ყველაზე ლეგიტიმური შეკითხვა, რომელსაც აბსოლუტურად ყველას, ერთი და იგივე შეკითხვა აქვს, უამრავ ქართველს ვხვდები აქ, პრაღაშიც და ყველას აინტერესებს, რატომ აფარებს ხელს ივანიშვილი ამ ადამიანებს, რატომ იცავს ფარცხალაძეს, თუკი ის არაფრით არ არის თავად დაკავშირებიული ამ ყველაფერთან და არ არის გარეული. ასეც რომ არ იყოს, ამას ის ვერასოდეს ვერ დაამტკიცებს, სანამ პასუხისმგებლობის საკითხი არ დადგება ამ ადამიანების.
იმიტომ რომ არსებობს პოლიტიკური საჯარო ცხოვრების ანაბანა - ადამიანები, რომლებიც საზოგადოების წინაშე გამოვლინდებიან ხოლმე, როგორც სამართალდამრღვევები, როგორც კორუფციაში გახვეულები, როგორც სხვადასხვა ტიპის უფლებადამრღვევები, თუ მათი პასუხისმგებლობის საკითხს არ აყენებს ხელისუფლების პირველი პირი, შემდეგ აუცილებლად ქვეყანას უჩნდება რწმენა, განცდა კი არა, რწმენა, რომ ის პირველი პირი თავად იყო თანამონაწილე“, - განაცხადა ხიდაშელმა გადაცემაში „დიანა ტრაპაიძის დღის ამბები“.