საზოგადოება

თუ უფლებების შელახვის ფაქტები გამოიკვეთება, საქმე გადაეგზავნება საგამოძიებო ორგანოებს - ელზა ჯგერენაია

ჯანდაცვის სამინისტროს შრომისა და დასაქმების პოლიტიკური დეპარტამენტის უფროსმა ელზა ჯგერენაიამ კომენტარი გააკეთა „ფრესკოს“ თანამშრომლების მიერ გავრცელებულ განცხადებაზე, მაღაზიათა ქსელში მათი შრომითი უფლებების სავარაუდო დარღვევის შესახებ.

ჯგერენაიას თქმით, თუ დასაქმებულთა უფლებების შელახვის ფაქტი დადასტურდება, საქმე საგამოძიებო ორგანოებს გადაეგზავნება.

„ამჟამად ჩვენი ინსპექტორები ახორციელებენ გამოკითხვას როგორც დამსაქმებელთან, ასევე დასაქმებულებთან. შესაბამისად, დაიდება დასკვნები და რეაგირებისთვის, თუ ამის ნიშნები გამოიკვეთება, აუცილებლად გადაეგზავნება საგამოძიებო ორგანოებს“, - ამბობს ჯგერენაია ჟურნალისტებთან საუბარში.

შეგახსენებთ, რომ სოციალურ ქსელ ფეისბუქზე ფრესკოს თანამშრომლები განცხადებას ავრცელებენ. 9-პუნქტიან წერილში მაღაზიათა ქსელის მომუშავე პერსონალი მისი შრომითი პირობების დარღვევებზე საუბრობს.

ანა მებურიშვილი