პოლიტიკა

უვიზო რეჟიმის მქონე ქვეყნების მოქალაქეებისთვის ევროკავშირში გასამგზავრებლად ფასიანი ელექტრონული რეგისტრაცია დაწესდება

უვიზო რეჟიმის მქონე ქვეყნების, მათ შორის საქართველოს მოქალაქეებს, ევროკავშირში გასამგზავრებლად ფასიანი ელექტრონული რეგისტრაცია დასჭირდებათ.

შესაბამის ინიციატივას მხარია ევროპარლამენტმა დაუჭირა.

ელექტრონული ავტორიზაციის ღირებულება 7 ევრო იქნება. ავტორიზაცია 18 წლამდე და 70 წელს გადაცილებული პირებისთვის უფასო იქნება.

კანონპროექტს, რომელიც ევროკავშირის მგზავრთა საინფორმაციო და ავტორიზაციის სისტემის, ETIAS-ის შექმნას ითვალისწინებს, ევროპარლამენტის 494 წევრმა დაუჭირა მხარი, წინააღმდეგ 115 ევროპელი კანონმდებელი იყო, 30-მა კი, თავი შეიკავა.

სასაზღვრო კონტროლის ახალი სისტემა 2021 წლიდან უნდა ამოქმედდეს.

ავტორიზაციის ერთხელ გავლის შემთხვევაში, ის სამ წლის განმავლობაში იმოქმედებს.

აპლიკანტი ავტორიზაციას აპლიკაციის შევსებიდან თითქმის დაუყოვნებლივ მიიღებს.

აპლიკაციაში პერსონალური მონაცემების შესახებ შეკითხვების გარდა, იქნება კითხვები წარსულში ნასამართლეობის ან აპლიკანტის მიერ კონფლიქტის ზონებში ყოფნის შესახებ. აღნიშნული ხელისუფლების წარმომადგენლებს საშუალებას მისცემს, ევროკავშირში მის ჩასვლამდე განსაზღვრონ, წარმოადგენს თუ არა პირი საფრთხეს. ასეთ შემთხვევაში, მგზავრს ევროკავშირში შესვლის უფლება არ მიეცემა.

როგორც ევროდეპუტატები აცხადებენ, შემოწმება მგზავრებს პრობლემებს არ შეუქმნის.

ევროპარლამენტის მიერ ინიციატივის დამტკიცების შემდეგ, მას ევროკავშირის მინისტრთა საბჭომაც უნდა დაუჭიროს მხარი.