პოლიტიკა

უზენაესი სასამართლოს კანდიდატებით პრეზიდენტი არასოდეს ვაჭრობს - კახა კოჟორიძე

პარლამენტის ფრაქცია ,,ქართული ოცნების’’ თავმჯდომარის, გიორგი ვოლსკის განცხადებას იმასთან დაკავშირებით, რომ მმართველმა გუნდმა შესაძლოა, პრეზიდენტის მიერ დასახელებულ უზენაესი სასამართლოს წევრობის კანდიდატებს მხარი არ დაუჭიროს, პრეზიდენტის მრჩეველი კახა კოჟორიძე პასუხობს.

ის გამორიცხავს რაიმე სახის კონსულტაციებს მმართველ გუნდთან უზენაესი სასამართლოს მოსამართლეობის კანდიდატებთან დაკავშირებით.

როგორც კახა კოჟორიძემ პრეზიდენტიოს ადმინისტრაციაში ჟურნალისტებს განუცხადა, გაუგებარია, რატომ ითხოვს მმართველი გუნდი კონსულტაციებს, როცა პრეზიდენტის პრეროგატივაა უზენაესი სასამართლოს მოსამართლეების კანდიდატურების წარდგენა.

,,უზენაესი სასამართლოს კანდიდატებით პრეზიდენტი არასოდეს ვაჭრობს. ჩემთვის მართლაც გაუგებარი განცხადებაა; გაუგებარია, პირველ რიგში, იმიტომ, რომ კანდიდატები პრეზიდენტის მიერ არის უკვე დასახელებული. მეორე იმიტომ, რომ ამ კანდიდატებთან დაკავშირებით საპარლამენტო-საკომიტეტო განხილვები უკვე დასრულებულია და მესამე და მთავარი - საქართველოს პრეზიდენტის პრინციპული პოზიციაა, რომ პოლიტიკური კონსულტაციები თუ კულუარული შეთანხმებები უზენაესი სასამართლოს კანდიდატებთან დაკავშირებით არ გაიმართოს.

უზენაესი სასამართლო უნდა იყოს არბიტრი, შემფასებელი პოლიტიკისგან გვერდით მგდომი ინსტიტუტი და შესაბამისად, ის არ უნდა ჩაერთოს პოლიტიკაში. ამიტომ, კანდიდატებზე შეთანხმება არ უნდა იყოს პოლიტიკური პროცესის თუ კულუარული შეთანხმებების, კონსულტაციების საგანი’’, - განაცხადა კახა კოჟორიძემ.

ნინო ექვთიმიშვილი