კომენტარი

უზნეობაა იმის მტკიცება, რომ ვანო ზარდიაშვილის ხელით შეტევა მიიტანა უმრავლესობამ ეკატერინე ბესელიაზე - გია ვოლსკი

უზნეობაა იმის მტკიცება, რომ ვანო ზარდიაშვილის ხელით შეტევა მიიტანა უმრავლესობამ ეკატერინე ბესელიაზე, - ამის შესახებ უმრავლესობის ლიდერმა გია ვოლსკიმ ჟურნალისტებს დეპუტატ ვანო ზარდიაშვილისა და ეკა ბესელიას მიერ ბოლო პერიოდში გაკეთებული განცხადებების შეფასებისას განაცხადა.

„უზნეობაა იმის მტკიცება, რომ ვანო ზარდიაშვილის ხელით შეტევა მიიტანა უმრავლესობამ ეკატერინე ბესელიაზე. ეს პოლიტიკური უზნეობაა და გარკვეულ პროპაგანდისტულ მიზანს ემსახურება. ეს, სამწუხაროდ, დეპუტატებს შორის ასეთი შეძახილების და შეხლა-შემოხლის ეპიზოდები ჩვენს პოლიტიკურ ცხოვრებას გააჩნია და მე ვფიქრობ, რომ ის მომავალში ან დარეგულირდება ანდა ისეთი გზით გაგრძელდება, როგორიც არა მარტო საქართველოს, არამედ ბევრ დემოკრატიას ახასიათებს. საზოგადოება არის ყველაზე დიდი და ყველაზე მძლავრი ეთიკური საბჭო, რომელიც შეფასებებს მისცემს ყველაფერ ამას 2020 წლის არჩევნების დროს,“ - განაცხადა გია ვოლსკიმ.

შეგახსენებთ, რომ გუშინ ვანო ზარდიაშვილმა ეკა ბესელიას ვირთხა უწოდა და აღნიშნა, რომ მას გუნდის კულუარული ინფორმაცია გარეთ გაჰქონდა. მან ეკა ბესელია კორუფციულ გარიგებებში დაადანაშაულა. ეკა ბესელიამ კი მას მხდალი უწოდა და "ოცნებას" მიმართა, რომ ნუ აიძულებენ, გახსნას ყველა კარტი.

ეკა ბესელიამ უკვე განაცხადა, რომ ვანო ზარდიაშვილს, რომელმაც მას ვირთხა უწოდა, ეთიკის კომისიაში უჩივლებს და მისთვის დეპუტატის მანდატის ჩამორთმევას მოითხოვს.

ეთიკის საბჭოში საჩივრის შეტანას აპირებს ვანო ზარდიაშვილიც. ის არ აპირებს ბოდიშის მოხდას მისი განცხადების გამო.