საზოგადოება

ვერ მოვისმინე, რატომ არის საჭირო 11 თვით ტელე თუ რადიოგადაცემების დახურვა -უჩა ნანუაშვილი

სახალხო დამცველის, უჩა ნანუაშვილის განცხადებით, საზოგადოებრივ მაუწყებელში მიმდინარე პროცესები კითხვებს ბადებს.

კერძოდ, სახალხო დამცველისთვის გაუგებარია, თუ რატომ არის საჭირო 11 თვით მაუწყებლის რადიო და ტელეპროგრამების გაჩერება, იმისთვის, რომ არხზე რეფორმა გატარდეს.

ამასთან, როგორც ნანუაშვილმა მედიასთან საუბარში აღნიშნა, საზოგადოებრივ მაუყებელს აქვს ვალდებულება საზოგადოებას სხვადასხვა საკითხებზე ინფორმაცია მიაწოდოს, მითუმეტეს იმ ვითარებაში, როდესაც ქვეყანაში აქტიური პოლიტიკური პროცესები მიმდინარეობს, იქნება ეს საკონსტიტუციო რეფორმა, თუ მზადება ადგილობრივი თვითმმართველობის არჩევნებისთვის.

„რეფორმა მაუწყებელში არის აუცილებელი, თუმცა ეს რეფორმა არ უნდა შეეხოს ჟურნალისტებს, იმ თანამშრომლებს, რომლებიც დღეს იქ მოქმედებენ და მათი უფლებები მაქსიმალურად უნდა იყოს დაცული. კითხვის ნიშნები არსებობს, თუ რატომ არის საჭირო 11 თვით სხვადასხვა პროგრამების გაჩერება, მითუმეტეს იმ ფონზე, როდესაც ქვეყანაში მიმდინარეობს საკმაოდ აქტიური პოლიტიკური პროცესები, საკონსტიტუციო რეფორმა, მზადება ადგილობრივი თვითმმართველობის არჩევნებისთვის.

ზოგადად მაუწყებელს, განსხვავებით სხვა მედიისგან, აქვს დამატებით ვალდებულება კანონის თანახმად, რომ მოსახლეობას მიაწოდოს ინფორმაცია სხვადასხვა საკითხებზე. აქედან გამომდინარე, ამ ვალდებულების შესრულება არის აუცილებელი.

მე, მაგალითად, ვერ მოვისმინმე, რატომ არის აუცილებელი და მნიშვნელოვანი სხვადასხვა რადიო თუ ტელეგადაცემების დახურვა ამდენი ხნის განმავლობაში“,-განაცხადა უჩა ნანუაშვილმა.

მონიკა დავლიანიძე