საზოგადოება

ვინც მუშაობენ და ჯერ არ დახურულან შემოიტანონ რეკლამა ტელეკომპანია „იბერიაში“ - ნატო ჩხეიძე ბიზნესმენებს მიმართავს

უკვე მეორე დღეა, ტელეკომპანია ,,იბერიას“ ეთერში საინფორმაციო გამოშვება და გადაცემები აღარ გადის.

"იბერიისა" და "ომეგა ჯგუფის" დამფუძნებელები, დამოუკიდებელი არხისთვის ფინანსური პრობლემების შექმნაში სწორედ ხელისუფლებას ადანაშაულებენ და აცხადებენ, რომ მმართველმა გუნდმა ამ შედეგის მისაღწევად ყველაფერი გააკეთა.

იბერია ტვ-ს დამფუძნებელი ნატო ჩხეიძე ტელევიზიაში ცოტა ხნის წინ მივიდა და თანამშრომლებს ხვდება. შეხვედრამდე მან ბიზნესმენებს მიმართა, დაეხმარონ ტელეკომპანიას მუშაობის აღდგენაში.

„ის, რაც იყო მცირე საშუალებები რეკლამებიდან, ის ყველაფერი ამოიწურა. თუ იქნება რაიმე რეკლამა, ძალიან დიდი თხოვნით მივმართავ, თუკი უნდათ, რომ ამუშავდეს ტელეკომპანია „იბერია“, არსებობს ორი საშუალება - ერთი „ომეგა ჯგუფი“ ამუშავდეს და მეორე საშუალებაა, რომ იმათ, ვინც მუშაობენ და ჯერ არ დახურულან ამ ხელისუფლების პირობებში, შემოიტანონ რეკლამა ტელეკომპანია „იბერიაში“,-ამბობს ნატო ჩხეიძე.

ამასთან, ტელეკომპანია „იბერიას“თანამშრომლები კი ამბობენ, რომ წინ არჩევნებია და ძალიან სამწუხაროა, რომ წინასაარჩევნო პროცესებსა და არჩევნებს ტელეკომპანია ვერ გააშუქებს.