საზოგადოება

ვითხოვთ, განათლების კომიტეტი დაუბრუნდეს ცვლილებებზე მუშაობას - „აუდიტორია 115“

სტუდენტურმა მოძრაობამ „აუდიტორია 115“-მა მოსთხოვა განათლებისა და მეცნერების კომიტეტს, დაუბრუნდეს მუშაობას ცვლილებებზე „უმაღლესი განათლების შესახებ“ კანონში. - ამის შესახებ „აუდიტორია 115“-ის წევრმა გიორგი ჯავახაძემ განაცხადა დღევანდელ პრესკონფერენციაზე.

ჯავახაძის თქმით, განათლების კომიტეტის მიერ მოლაპარაკებების შეწყვეტის პროცესში, შესაძლოა, სუს-ი იყოს ჩარეული.

„ჩვენი დაპირება კომიტეტისადმი იყო ასეთი, რომ როგორც კი მივიღებდით რეგისტრირებულ კანონპროექტს, ჩვენ მაშინვე დავტოვებდით მეექვსე კორპუსს. თუმცა მოლაპარაკების რაღაც ეტაპზე განათლებისა და მეცნიერების კომიტეტმა ჩვენთან საუბარი შეწყვიტა, რაც გვაფიქრებინებს, რომ საქმეში შეიძლება ჩაერიოს სუს-ი“,- განაცხადა ჯავახაძემ

„აუდიტორია 115“-ის წევრის თქმით, თუკი განათლებისა და მეცნიერების კომიტეტი არ განაახლებს ცვლილებათა პაკეტზე მუშაობას, ის პასუხისმგებელი იქნება უნივერსიტეტში სიტუაციის შესაძლო გამწვავებაში.

„ჩვენ ვითხოვთ, განათლების კომიტეტმა განაახლოს მუშაობა ცვლილებებზე, დაარეგისტრიროს ის პაკეტი, რომელზეც შედგა შეთანხმება განათლების კომიტეტსა და „აუდიტორია 115“-ს შორის. წინააღმდეგ შემთხვევაში, უნივერსიტეტში მიმდინარე პროცესები შეიძლება კიდევ უფრო გამწვავდეს და ამაზე პასუხისმგებლობა უნდა აიღოს განათლებისა და მეცნიერების კომიტეტმა“, - თქვა ჯავახაძემ.

კერძოდ, სტუდენტური მოძრაობა ითხოვს, გაუქმდეს „უმაღლესი განათლების შესახებ“ კანონის 45-ე მუხლი, რომელიც განსაზღვრავს სტუდენტური თვითმმართველობის წევრების არჩევის წესსა და მის უფლება-მოვალეობებს.

რაც შეეხება დაკავებულ მეექვსე კორპუსს, ჯავახაძის თქმით, სანამ ცვლილებები ძალაში არ შევა, „აუდიტორია 115“-ი შენობას არ დატოვებს.

ანა მებურიშვილი